WALA PANG DESISYON SA SULU SHOOTING – SINAS

Nilinaw ni Philippine National Police chief Police General Debold Sinas nitong Lunes na wala pa umanong pinal na desisyon para sa rekomendasyon ng Internal Affairs Service (IAS) na alisin na ang mga pulis na may kaugnayan sa Jolo, Sulu shooting incident.

“Wala pa po. Hindi pa po umabot sa opisina ko. I don’t know kung sino ang naglabas ng recommendations na ‘yun, supposed to be hindi dapat basta-basta nilabas kasi hindi pa nga namin na-approve ‘yun,” pahayag ni Sinas.

“Baka in transit pa ‘yun. May dadaanan pang mga opisina ‘yun at kung bago man dumating sa atin ‘yun ay papareview pa natin sa legal officer namin kung ano ang appropriate,” dagdag niya.

Ayon pa sa PNP chief, anuman ang kanyang maging desisyon kaugnay sa suhestiyon ng IAS laban sa mga pulis na involved umano sa insidente ay maaari nilang iapela sa National Police Commission (Napolcom).

Kung matatandaan, pinuri ng Armed

Forces of the Philippines (AFP) ang rekomendasyon ng IAS at inaasahan ng militar na masasampahan ng criminal at civil cases ang mga pulis na may kaugnayan sa June 29 shooting incident na ikinamatay ng apat na intelligence officers.

Ang mga nasabing intelligence officers ng militar ay nagsasagawa umano ng operation upang hanapin ang mga suspected suicide bombers sa Jolo nang harangin sila ng mga pulis sa Barangay Walled City.

At kahit na umano nagpakilala nang mga miyembro ng militar, sinabihan umano sila ng mga pulis na sumama sa presinto upang maimbestigahan ang kanilang mga pagkakakilanlan.

Ayon sa isang police report, nangyari umano ang barilan nang tumakas umano ang mga intelligence officers at tutukan umano ng baril ang mga pulis.

Sinabi na ni AFP chief General Gilbert Gapay na Philippine Army commander pa noong panahon na yun ay murder umano ang nangyaring insidente at iginiit na maraming inconsistencies ang spot report ng pulis.