BAKUNA PARA SA LAHAT!
PALASYO, NANGANGAKO NA…
Sinisiguro ng Malakanyang nitong Martes na magkakaroon ng sapat na supply ng bakuna laban sa coronavirus disease (COVID-19) at mababakunahan ang aabot sa 70 milyong Pilipino bago matapos ang kasalukuyang taon.
Ayon kay Presidential spokesperson Harry Roque, ginagawa nan g pamahalaan ang lahat upang masigurong makakakuha ang Pilipinas ng sapat na bakuna para sa mga mamamayan nito upang maprotektahan ang sambayanan laban sa COVID-19.
Ang pahayag ni Roque ay kasunod nang pagka-antala ng unang batch ng 117,000 Pfizer-BioNTech COVID-19 vaccines mula sa COVAX facility dahil sa kakulangan ng indemnification measure sa parte ng gobyerno kung sakaling may makaranas nang adverse side effects mula sa pagbabakuna laban sa COVID-19.
Sinabi rin ng tagapagsalita ng Palasyo na makakakuha ang bansa ng higit sa 160 milyong COVID-19 vaccine doses.
Ang 44 million doses ay magmumula sa WHO-led COVAX facility at inaasahang darating ngayong Pebrero, 25 million doses mula sa Sinovac, 10 to 15 million doses mula sa Gamaleya (Sputnik V) at inaasahang darating sa Abril, 30 million doses mula sa Novavax na darating sa Mayo, 17 million doses mula sa AstraZeneca, 20 million doses mula sa Moderna na darating sa Hulyo, 15 million doses mula sa Pfizer-BioNTech na darating sa Agosto at five million doses mula sa Johnson and Johnson (Janssen) na darating sa Oktubre.
“We will have vaccines because we are not just dependent on the Western vaccines. There is also Novovax, which is going to be the largest volume that we will order,” saad ni Roque. “So kampante po tayo na sapat-sapat ang magiging bakuna natin.”
Maliban sa COVAX facility, karamihan sa mga bakuna ay galing sa mga western manufacturers maliban sa Sinovac ng China at Gamaleya ng Russia.
Kung matatandaan, sinabi ni vaccine czar Carlito Galvez Jr. na target ng pamahalaan na mabakunahan ang higit sa 70 milyong Pinoy sa loob ng kasalukuyang taon, na maituturing na isang best-case scenario.
Ang Food and Drug Administration (FDA) naman ay nakapag-issue na ng emergency use authorization (EUA) sa Pfizer-BioNTech at AstraZeneca at ang EUA ay kinakailangan upang magamit ng legal ang mga bakuna sa bansa.
Nitong nakaraan din ay nag-issue ang FDA ng compassionate special permit para sa 10,000 doses ng Chinese vaccine Sinopharm para magamit naman ng mga miyembro ng Presidential Security Group.