PROTESTA NI MARCOS SA VP RACE, IBINASURA NG PET
Ibinasura na ng mga mahistrado ng Supreme Court (SC) na tumatayo bilang Presidential Electoral Tribunal (PET) nitong Martes ang protesta ni dating Senador Ferdinand “Bongbong” Marcos Jr. laban kay Vice President Leni Robredo.
Kung matatandaan, inakusahan ni Marcos na nagkaroon ng dayaan kaya nanalo si Robredo at nakalamang sa kaniya ng 263,473 boto.
Hiniling niya sa SC, na nagsisilbing PET na dumidinig sa mga protesta sa resulta ng halalan ng pangulo at bise presidente, na muling bilangin ang mga boto sa ilang lalawigan na pinaniniwalaan niyang nagkaroon ng dayaan partikular sa Camarines Sur, Iloilo at Negros Oriental.
Pero matapos ang recount ng PET, lumitaw na nadagdagan pa ang lamang ni Robredo kay Marcos. Ayon kay SC spokesperson Brian Hosaka, “unanimous” ang boto ng mga mahistrado na ibasura ang protesta ni Marcos na isinampa noong June 29, 2016 para ipawalang-bisa ang panalo ni Robredo.
Sa 15 mahistrado na dumalo sa pulong, sinabi ni Hosaka na pito ang “fully concurred” sa desisyon na ibasura ang protesta, at umayon naman sa pasya ang iba pa at ilalagay din umano sa website ng SC ang naturang desisyon.
Sa kabila ng pagkakabasura ng protesta ni Marcos, hindi naman binanggit ni Hosaka kung maaari pang iapela ng dating senador ang desisyon ng PET.
“I cannot answer the question because I only have the information which I read,” sabi ni Hosaka. Samantala, sinabi naman ni Atty. Romulo Macalintal na abogado ni Robredo na hindi pa nila nakikita ang kopya ng desisyon.
“Hindi pa kami nakakatanggap ng desisyon, nakinig lamang kami sa presscon,” pahayag ni Macalintal. “Ngayon lang kami magkakausap mula nung magkaroon ng pandemya tungkol sa bagay na ito.”
Ayon naman sa abogado ni Marcos na si Atty. Lawyer Vic Rodriguez, hindi pa sila nakatatanggap ng desisyon ng SC.
“The information that we have are primarily sourced from our media friends and not from any official notice or information emanating from the Presidential Electoral Tribunal,” saad ni Rodriguez.
“We shall issue our statement on the matter as soon as we have established the facts based on official document or pronouncement coming from the PET,” dagdag niya.
Ang Malakanyang naman, sinabing iginagalang nila ang desisyon ng PET.
“‘Yan ay desisyon ng Kataas-taasang Hukuman. We respect that,” saad ni presidential spokesperson Harry Roque. “We respect also that the camp of (former) senator Bongbong Marcos has a further remedy of moving for reconsideration.”