ADVANCE PAYMENT PARA SA ASTRAZENECA, INAPRUBAHAN NI YORME
Inaprubahan na ni Manila Mayor Francisco “Isko Moreno” Domagoso ang P38.4-million advance payment para sa British-Swedish drugmaker AstraZeneca upang makakuha ng 800,000 doses ng COVID-19 vaccine nito.
Ayon sa Manila Public Information Office (PIO), ang nasabing halaga ay katumbas ng 20-percent advance payment.
“The key to the city’s economic recovery is mass vaccination against COVID-19. Kapag may bakuna na, makakagalaw na ulit ang mga tao. Businesses can reopen and those who lost their jobs can once again go out and seek employment,” saad ni Domagoso.
Dagdag naman ng Manila PIO, ang mga bakuna na inorder ng lokal na pamahalaan ay sasapat upang mabakunahan ang 400,000 katao.
Sa kasalukuyan, nasa 88,000 na ang nakapagpa-register para sa COVID-19 vaccine gamit ang isang website na inilabas ng Manila City government sa pagsisimula ng taon.
Nito lamang din ay pinasinayaan na ang isang storage facility para sa mga vaccines sa Sta. Ana Hospital.
Target ng lokal na pamahalaan ng Maynila ang makapagpatayo ng aabot sa 18 vaccination sites na makaka-accommodate ng 1,000 katao araw-araw.
Sinabi naman ni Domagoso na payag siyang magpabakuna sa harap ng publiko upang maibalik ang tiwala ng sambayanan sa mga bakuna.
“Yes, I will willingly get vaccinated publicly so I can show people that the vaccine is safe. Hopefully, the example that I set will convince them to get vaccinated, too,” sabi ni Domagoso.