‘RUN SARA RUN’ TARPS TAMA BANG TANGGALIN?
Nagkalat na kung saan-saan ang mga tarpaulin na naghihikayat sa anak ni Pangulong Rodrigo Duterte na si Davao City Mayor Sara na tumakbo sa pampanguluhang eleksyon sa 2022.
Isa na sa mga lugar kung saan nakabalandra ang mga tarpaulin ay sa Cebu City, na sadyang hindi naman yata nagustuhan ng mga lokal na opisyal ng lungsod.
Dahil dito, iniutos kahapon ng Cebu City Office of the Building Chief na si Florante Catalan na tanggalin ang mga tarpaulin na ikinabit sa iba't ibang kalsada sa lungsod.
Ayon kay Catalan, pinatanggal ang mga nasabing tarpaulin dahil wala naman silang natatanggap na aplikasyon para ikabit ang mga nasabing materyales mula sa mga sinasabing "Friends of Sara" o mga organizer ng "Run Sara Run".
Ang tanggapan ni Catalan ang siyang nangangasiwa at tumitiyak na ang National Building Code ay nasusunod.
Kailangan umano ng permit mula sa lokal na pamahalaan bago makapaglagay ng streamer sa iba't ibang pampublikong lugar base na rin sa ipinaiiral na City Ordinance.
Kung simpleng pagsunod sa batas ang nais pairalin ng opisyal hinggil sa tarpaulin ng mga kaibigan ni Sara na naglalayong siyang patakbuhin sa darating na eleksyon, walang dahilan para ito ay tutulan o hadlangan.
Kaisa tayo palagi sa kaayusan at tamang pagsunod sa batas.
Pero kung ang nasabing utos ay may udyok ng pulitika at ginagawang dahilan lamang ang tinutukoy na batas ni Catalan, isa yata itong malaking kalokohan. Lalo pa't nagsalita na rin ang isang opisyal ng Commission on Elections na wala naman talagang paglabag sa election laws dahil unang-una ay hindi pa eleksyon