DARATING NA SA BANSA!

PAGKATAPOS NG SINOVAC, ASTRAZENECA NAMAN…

Inihayag ni Senador Christopher Lawrence “Bong” Go nitong Miyerkules na inaasahang darating na sa Pilipinas ang 487,200 doses ng coronavirus disease (COVID-19) vaccines na gawa ng AstraZeneca.

Ayon kay Go, nakakuha umano ng notice ang Pilipinas na nakatakda nang dumating sa bansa ang bakuna mula sa AstraZeneca ngayong Huwebes ng gabi.

Kung matatandaan, dapat ay dumating na sa bansa ang mga bakuna mula sa AstraZeneca noong Marso 1 subalit nagkaroon ng aberya dahil umano sa kakulangan sa supply nito.

“Yung hindi natuloy na pagpapadala ng bakuna nung Lunes mula sa AstraZeneca ay meron nang liham na darating na sana bukas ng gabi yung 487,200 doses,” saad ni Go sa isang pahayag.

Kinumpirma naman ng Malakanyang ang nakatakdang pagdating ng AstraZeneca vaccines at sinabi nito na parte ito ng COVAX Facility.

“This is to confirm that the Philippines is set to receive 487,200 doses of AstraZeneca vaccines tomorrow, March 4, 2021, 7:30 p.m., as part of the first round of allocated doses from the COVAX facility,” saad ni Presidential spokesperson Harry Roque.

Ang COVAX ay ang global effort na pinangungunahan ng World Health Organization (WHO) kung saan nagtulong-tulong ang mga mayayamang bansa para mabigyan nang tulong ang mga developing countries sa paglaban sa COVID-19 pandemic.

Kasama rin dito ang pagbibigay ng access sa mga nasabing bansa para sa COVID-19 vaccines.

“AstraZeneca’s expected time of arrival is based on the scheduled handover of vaccines. We will notify everyone, if and when there is a change of schedule,” sabi ni Roque.

Samantala, sinabi naman ni Go na personal na sasalubungin ni Pangulong Rodrigo Duterte ang pagdating ng mga bakuna mula sa AstraZeneca sa Villamor Airbase.

Kung matatandaan, nabigyan na ng Food and Drug Administration (FDA) ng emergency use authorization ang bakuna mula sa AstraZeneca.

Sinabi rin ng senador na ang pagdating ng AstraZeneca vaccines ay isang magandang balita sa mga frontliners dahil magkakaroon na rin sila nang karagdagang opsyon sa bakuna.