SI DUTERTE ANG BAHALA SA BAKUNA NIYA – PALASYO
Inihayag ng Malakanyang nitong Huwebes na ang edad at posisyon ni Pangulong Rodrigo Duterte ang nagbibigay ng posisyon sa kanya upang makapamili kung anong bakuna laban sa coronavirus disease (COVID-19) ang kanyang ipapaturok sa sarili.
Ayon kay Presidential spokesperson Harry Roque, malayang makakapamili kung anong brand ng bakuna ang gagamitin ng Pangulo dahil una sa lahat ay siya ang pinakamataas na lider ng bansa at kasunod naman noon ang kanyang edad na lampas 70 years old.
“I think the President is a president, and because he is over 70 years old,” sabi ni Roque. “Kung masusunod talaga, hindi talaga dapat magpabakuna pa si Presidente dahil hindi pa tapos ang mga medical frontliners.”
Dagdag pa ng tagapagsalita ng Palasyo, mas gusto ng Pangulo ang isang Chinese brand na hindi pa available sa Pilipinas dahil naghihintay pa rin ito ng emergency use authorization (EUA).
“However, I will ask if he will consider AstraZeneca because in other countries, wala naman limitation on the use of AstraZeneca,” saad ni Roque. “But let’s wait po for the actual arrival of AstraZeneca kasi (because) right now, everything is speculative.”
Ang Pangulo ay may mga underlying medical issues kung kaya naman isa siya sa mga vulnerable sa COVID-19.
Noong nakaraang taon, sinabi ng Pangulo na at risk siya sa pagdevelop ng cancer dahil sa Barrett’s esophagus o ang pamamaga ng tubong nagkokonekta sa bibig at sikmura.
Sinabi rin ni Duterte na nakakaranas rin siya ng back pains, migraines at mayroon umano siyang Buerger’s disease.