RED-TAGGING SA COMMUNITY PANTRIES, PINAIIMBESTIGAHAN
Ipinag-utos ng Philippine National Police (PNP) nitong Miyerkules ang pagsasagawa ng imbestigasyon kaugnay sa mga umano’y redtagging ng mga community pantry organizers na ginawa ng kapulisan.
Ayon kay PNP spokesperson Police Brigadier General Ronaldo Olay, inatasan ni PNP chief Police General Debold Sinas ang Criminal Investigation and Detection Group (CIDG) at lahat ng police regional offices na magsagawa ng imbestigasyon sa mga involved personnel nito.
“Pinagutos na rin niya kanina na imbestigahan ng CIDG at mga police regional offices yung alleged red-tagging na ‘yan. Imbestigahan nila ‘yung sarili nilang tauhan,” sabi ni Olay.
Dagdag niya, ang PNP AntiCybercrime Group ay inatasan ding imbestigahan ang mga text messages at social media posts na nag-uugnay umano sa mga organizers ng community pantries at mga rebeldeng grupo.
Nitong Miyerkules rin, sinabi ng National Capital Region Police Office (NCRPO) na iimbestigahan nito ang mga police officers na involved umano sa profiling ng community pantry organizers.
Giit ni NCRPO chief Police Major General Vicente Danao, walang utos galing sa liderato ng PNP na magsagawa ng profiling ng mga organizers ng community pantries.
“Kung meron man po, ang ating opisina ay iimbestigahan po kung meron mang pulis na involved. Pero wala pong instruction coming from higher level, o sa aking level, o sa level siguro po ng director na gawin,” saad ni Danao.