SARILI LANG ANG MAAASAHAN
Hindi magkakaroon ng bakuna ng lahat sa mundo hanggang hindi inoobliga ng mahihirap na bansa ang mayayamang bansa at ang mga dambuhalang kumpanya ng gamot na bawas-bawasan ang pagkaganid at ikonsidera ang pandaigdigang pagkakaisa para sa kapakinabangan ng sangkatauhan.
Ang isa pang opsiyon ay ang pagiging self-sufficient.
Pero hanggang sinusugapa ng iilan ang bakuna at gamot na tanging pag-asa ng pandemya, hindi matutuldukan ang pandaigdigang krisis na ito.
Tinukoy ng Switzerland-based global watchdog na Public Eye ang Big Pharma, o ang mga estratehiya ng mga monopolistang multinational drug firms na pagkakitaan ang pandemya: tukuyin ang mga research at development sa larangan ng kikitain; abusuhin ang mga patents para makontrol ang lahat ng impormasyon habang lumolobo ang presyo at nililimitahan ang supply; kontrolin ang supply chain pabor sa pangangailangan ng mayayamang bansa; umiwas sa pananagutan sa publiko; magtakda ng mga clinical trials para sa pansariling interes; isapribado ang lahat ng pagsisikap; at igiit ang mga hindi makatwirang pagtatakda ng hindi mababagong presyo.
Ayon sa pag-aaral, bago pa manalasa sa ating planeta ang coronavirus disease 2019 (COVID-19), ang negosyo ng bakuna ay nahahati sa apat na major players: Pfizer, Sanofi, GlaxoSmithKline (GSK), at Merck.
Sinabi ng Public Eye na natukoy ng mga eksperto ang “atmosphere of extreme reluctance” ng mga kumpanyang ito na gawin ang bakuna laban sa coronavirus sa mga unang linggo ng pandemya.
Nagbago ang kanilang isip kasabay ng pangangako ng bilyun-bilyong dolyar mula sa mayayamang bansa.
Sa huli, kung lilimiin ang pag-aalangan ng Big Pharma at ng mayayamang bansa na isantabi ang kanilang pansariling interes para sa kagalingan ng buong sangkatauhan, pinakamainam na ang bawat isang bansa ay maglunsad ng sarili nilang mga pag-aaral para mabigyang lunas ang COVID-19, kabilang na ang mga natural na gamot.
Sa ganitong paraan lamang makakaalpas ang maliliit na bansa sa pagdepende sa mayayamang bansa at sa mga dambuhala pero sugapang kumpanya tuwing panahon ng pandaigdigang krisis.