PRESIDENTIABLES NI RODY, INILABAS
PANGULONG DUTERTE, MAY NAPUPUSUAN NA BA?
Inihayag ng Malakanyang nitong Huwebes na mayroon na umanong napupusuan ang Pangulong Rodrigo Duterte na maaari umanong kumandidato bilang pangulo ng bansa sa 2022 national elections.
Ayon kay Presidential spokesperson Harry Roque, nabanggit umano ng Pangulo sa ilang mga pagkakataon ang kanyang pinagpipilian bilang susunod na presidente ng Pilipinas.
Kasama sa mga pinagpipilian umano ng Pangulo ay ang anak niyang si Davao City Mayor Sara Duterte-Carpio, Senador Christopher “Bong” Go, Manila Mayor Francisco “Isko Moreno” Domagoso, dating Senador Bongbong Marcos at si Senador Manny Pacquiao.
“Noong kinausap ko siya d’yan, wala pa siyang desisyon. Mayroon lang siya talagang mga options na sinabi,” saad ni Roque.
Nito lamang nakaraan, hinihimok ng PDP-Laban na siyang ruling party sa bansa ang Pangulo na tumakbo bilang bise presidente ng bansa sa national elections sa susunod na taon.
Pinapipili rin ang Pangulo ng kanyang magiging running-mate kung sakaling papayag itong tumakbo para sa ikalawang pinakamataas na posisyon sa bansa.
Kung matatandaan, ilang beses nang sinabi ng Pangulo na hindi niya papatakbuhin bilang presidente ang kanyang anak.
“Ang rekomendasyon niya ay ‘wag tumakbo si Sara. That’s the latest I heard from the President’s own mouth,” sabi ni Roque.
Pero ganunpaman, marami pa rin ang naniniwalang tatakbo ang Davao City mayor bilang pangulo dahil makailang-beses na itong nangunguna sa mga survey kung saan ipinapakita na marami ang may gustong tumakbo si DuterteCarpio sa pagka-presidente sa 2022 elections.