PROTEKSIYON NG FACE SHIELD
PARA kay Manila Mayor Isko Moreno, kung mapatutunayang sapat na ang pagsusuot ng mask at walang direktang kontribusyon ang face shield para protektahan ang tao laban sa COVID-19, hindi na dapat obligahin pa ang publiko na magsuot ng face shield sa labas ng bahay.
Sa panahon daw ng pandaigdigan at malawakang pagbabakuna laban sa nakamamatay na coronavirus, napansin ng alkalde na mga Pilipino na lang ang nagsusuot ng face shield sa mundo. Aniya, ang face shield, sa ngayon, ay para na lang sa mga nasa loob ng ospital, silang direktang nakalantad sa panganib ng pagkakahawa sa virus.
“I think napapanahon na irebisa, bisitahin muli ‘yung polisiya natin sa face shield, kasi baka naman hindi na kailangan, baka ‘yung face mask ay puwede na,” ani Moreno.
Nagbigay ang alkalde ng apat na dahilan kung bakit para sa kanya ay napapanahon nang hubarin ng publiko ang face shield, na may katumbas na multa kapag wala nito.
Una, karagdagang “gastusin” lang daw ito para sa mahihirap. Pangalawa, “dagdag-basura lang” daw ang plastic na face shield. Pangatlo, maaari raw itong magdulot ng sakit sa publiko kalaunan dahil “marami nang nahihirapang huminga.” At pang-apat, dumarami na ang “bakunado” kaya sasapat na raw, ayon sa alkalde, na “mag-facemask ka lang tapos mag-physical distancing.”
Pero kontra rito si Health Secretary Francisco Duque III at iginiit na masyado pang kakaunti ang nababakunahan sa bansa kontra COVID-19, dahil na rin sa kakaunti pang vaccine supply, para ikonsidera ang suggestion ng popular na alkalde ng Maynila.
“Okay mungkahi ni Mayor Isko kung malaki na vaccination coverage natin. Hindi pa puwedeng tanggalin ang face shield policy for now when our twodose vaccination coverage is a little over 2% due to still inadequate vaccine supply,” paliwanag ni Duque.
Dati nang iginiit ng DOH Secretary na suportado ng siyensiya ang paggamit ng face shield laban sa coronavirus, ayon daw sa isang pag-aaral na inilathala ng pangunahing international medical journal na The Lancet.
“There are many scientific studies showing that face shields in combination with face masks and more than one-meter social distancing provide a greater than 95% protection,” sinabi ni Duque noong nakaraang taon.
Disyembre 2020 nang istriktong ipatupad ng gobyerno ang pagsusuot ng face shield, bukod pa sa mask, bilang proteksiyon laban sa COVID-19 kapag lumalabas ng bahay.
Gayunman, mismong ang United States Center for Disease Control and Prevention (CDC) ay nagsabing ang pagiging epektibo ng face shield laban sa COVID-19 ay “unknown.” Ang malinaw lang, hindi inirerekomenda ng CDC ang paggamit ng face shield kapalit ng mask, dahil pinakamabisa pa rin daw ang mask bilang proteksiyon laban sa coronavirus.
“Face shields are not as effective at protecting you or the people around you from respiratory droplets,” ayon sa CDC.
Walang mawawala sa mga pandemic control policymakers kung paglalaanan nila ng ilang minuto ang pagtalakay sa mungkahing ito ni Moreno, kasabay ng masusing pagkonsidera sa mga tuklas at resulta ng mga pinakabagong pag-aaral at rekomendasyon mula sa health experts.