PARTIES, BAWAL PA RIN!
Muling nagpaalala ang Department of Health (DoH) sa publiko na ipinagbabawal pa rin ang mga parties at mass gathering sa bansa dahil patuloy pa rin ang krisis na kinakaharap ng sambayanan dala ng coronavirus disease (COVID-19) pandemic.
Innudyukan rin ng ahensya ang mga local government units (LGU) na mahigpit na ipatupad ang ban sa mga parties at mass gathering dahil maaari umano itong maging super spreader ng nakamamatay na sakit.
Ang Department of the Interior and Local Government (DILG) ay naglabas na ng memorandum circular no. 2021-058 na nagmamandato sa mga local chief executives na pag-ibayuhin pa ang pagpapatupad sa nasabing ban.
“Tayo rin po ay nakikiusap sa ating mga local government units at sa ating publiko na ipinagbabawal pa rin po ang mga pagtitipon gaya ng mga parties na maaaring maging source ng superspreader events,” saad ni Health Undersecretary Maria Rosario Vergeire.
Kung matatandaan, naglabas ang national government ng memorandum noong May 31, 2021 kung saan nakasaad sa probisyon na hindi maaaring payagan ang pagdiriwang ng mga piyesta, birthday parties at pagtitipon sa mga beaches at swimming pools.
“Sa loob po ng joint memo circular na ito, tinatawagan po ang lahat ng ating local government units na mas paigtingin ang pagpapatupad ng minimum public health standards, mula sa pagpapatigil ng mga malalaking pagtitipon, hanggang sa pagpapatupad ng mask wearing, face shield, physical distancing at saka oras ng curfew,” saad ni Vergeire.
“We urge the public to stay home and only go out when needed to prevent the transmission of COVID-19,” dagdag niya.
Pero hindi naman nilinaw ng DoH kung kasama sa ban ang mga pagdiriwang sa mga public areas gaya nang mga maliit na pagtitipon at mga wedding receptions.
“Para sa kaligtasan po ng lahat, kailangan ang walang mintis na pagsunod sa minimum public health standards upang maiwasan natin ang pagkakaroon ng panibagong surge,” sabi ni Vergeire.