KABAYANIHANG ‘DI DAPAT MALIMUTAN

ISANG kapuri-puring hakbangin ang pagpapatayo ng “Wall of Heroes” para bigyang-pugay ang mga doktor, nurses, at iba pang healthcare workers na binawian ng buhay sa pagbibigay-lunas sa mga dinapuan ng COVID-19 sa bansa.

Kasabay ng paggunita ng bansa nitong Sabado, Hunyo 12, ika-123 Araw ng Kalayaan, sa kabayanihan ng mga ninuno nating nakipaglaban sa kani-kanilang larangan para maisakatuparan ang minimithi nating kasarinlan, inianunsiyo ni Pangulong Rodrigo Duterte na kasalukuyang itinatayo ang Wall of Heroes sa Libingan ng mga Bayani sa Taguig City, sa pahintulot ng Armed Forces of the Philippines (AFP).

Sa Wall of Heroes, iuukit ang pangalan ng lahat ng medical frontliners—silang mga bayani ng pandemya—na nagbuwis ng kanilang mga buhay habang tumutupad sa tungkulin.

“Let us honor our modern-day heroes, our healthcare workers, law-enforcement officers and other frontliners who are instrumental in our fight against COVID-19 pandemic,” sabi ni Duterte.

“In the past year, they have risked their own lives and sacrificed their own comfort and security to ensure that our society will continue to function despite this crisis,” dagdag niya.

Simula nang manalasa ang pandemya noong Marso 2020, libu-libong healthcare workers na ang dinapuan ng COVID-19 matapos mahawahan ng kanilang pasyente o ng kapwa nilang empleyado sa ospital.

Maingat na kinukumpirma ng Department of Health (DOH) ang bilang ng mga health workers na nasawi sa COVID-19 dahil nagbibigay ang gobyerno ng P1 milyon sa bawat pamilyang naulila ng medical frontliners. Ang mga nagpositibo sa virus na malubha ang pagkakasakit, P100,000 naman ang tatanggapin bawat isa.

Kabilang sa mga doktor na nasawi dahil sa COVID-19 sina Romeo Gregorio N. Macasaet III, Marcelo Y. Jaochico, Raul D. Jara, Francisco Avelino S. Lukban, Salvacion Rodriguez Gatchalian, Raul D. Eslao, Leandro L. Resurreccion III, at Dennis Ramon M. Tudtud.

Dapat lamang na kilalanin ang mga sakripisyo at pagbubuwis ng buhay ng mga manggagawang pinakalantad sa nakamamatay na coronavirus. Dahil sa kanila, umabot pa ang karamihan sa atin sa panahong maaari na tayong bakunahan laban sa COVID-19.

Sa marahil ay pinakamatinding digmaan na sinabaka ng ating henerasyon, ang ating mga healthcare workers ang nanguna sa labanan, suot ang kani-kanilang personal protective equipment (PPE), mask, face shields, at gloves, armado ng kakayahang medikal habang taimtim na nananalangin ng proteksiyon at kaligtasan. Isinantabi ang sariling kapakanan at ang kaligtasan ng kanilang pamilya nang buong giting nilang hinarap ang bago at nakamamatay na virus para maprotektahan ang mas nakararami sa atin.

Hindi sana makalimot ang mga Pilipino sa kabayanihang ito ng ating medical frontliners sa mga susunod na taon, lalo na kapag tuluyan nang nakaalpas ang mundo sa malungkot na kabanata ng pandemyang ito.

Huwag sana silang matulad sa mga naunang nagpakabayaning Pilipino, na ang presensiya na lamang sa buhay ng mga susunod na henerasyon ay mga pangalang nauukit sa espesyal na pader na dinadaandaanan at suwerte nang masulyapan man lang.