NASAAN NA ANG MGA BAKUNA?
ISA na namang mas delikadong COVID-19 variant—ang Lambda—ang ikinababahala ngayon ng World Health Organization (WHO), kaya iginiit ng health agency ng United Nations (UN) ang pangangailangang maprotektahan ang mundo laban sa pabagsik nang pabagsik na uri ng coronavirus.
Dapat daw na mabakunahan kontra COVID-19 ang 85 porsiyento ng populasyon ng bawat bansa, ayon kay Dr. Rabindra Abeyasinghe, kinatawan ng WHO sa Pilipinas.
Importante raw na mabakunahan ng mga bansa ang 10 porsiyento ng populasyon nito pagsapit ng Setyembre, 40% sa pagtatapos ng 2021, at 70% sa Hunyo ng susunod na taon upang kahit paano ay makampante ang mundo sa proteksiyong hatid ng bakuna. Ito ay dahil inaasahang hindi ang Lambda ang huling variant na susulpot para mas manalasa sa mga labis nang naapektuhan ng pandemya.
Base sa personal niyang obserbasyon, nagpahayag ng kumpiyansa si Abeyasinghe na kakayanin ng Pilipinas na makatupad sa hinahangad nitong “population protection” laban sa COVID-19.
“We believe you will exceed the 10 percent before September and certainly you may exceed 40 percent threshold before end of year,” aniya.
Kahapon, Hulyo 6, umabot na sa 12 million doses ng COVID-19 vaccines ang naiturok sa mga Pilipino, isang milyon dito ay nagamit sa nakalipas na apat na araw, ayon kay National Task Force Against COVID-19 Deputy Chief Implementer Vince Dizon.
Sinegundahan ni Dizon ang taya ni Abeyasinghe na kakayaning protektahan ng pamahalaan ang mamamayan nito sa tulong ng mass vaccination.
Pero sinabi ito ni Dizon sa mismong araw kung kailan inianunsiyo ng maraming lokal na pamahalaan na pansamantala ng mga itong sinususpinde ang pagbabakuna ng first dose sa kanilang mamamayan dahil sa kawalan ng supply ng COVID-19 vaccine.
Walang bakuna habang daan-daan ang nakapila sa mga vaccination sites at hinihiling na mabakunahan sila—hindi na kailangang pakiusapan sila, bolahin, o bigyan ng insentibo, kusa na silang nagtitiyaga sa pila, pero walang maiiturok sa kanila.
Kung noon ay halos manikluhod ang gobyerno sa mamamayan para samantalahin ang libreng COVID-19 vaccine sa kanilang mga lokal na pamahalaan—at dumating pa nga sa puntong pinagbantaan silang ipaaaresto kung hindi magpapabakuna—ngayon naman ay walang bakunang maiturok sa kanila dahil sa kawalan ng supply.
Mahalagang paspasan ng gobyerno ang pagbili ng mga bakuna kung gusto nilang maraming buhay ng Pilipino ang maisalba at kung determinado talaga silang maabot ang population protection para sa kaligtasan ng lahat laban sa ano pa mang bago at delikadong COVID-19 variants.