ANO BA TALAGA?
Nitong nakaraang araw lamang ay nagkakaroon ng kalituhan kung mayroon nga ba o walang nangyayaring pagtaas o tinatawag na “surge” ng coronavirus disease (COVID-19) cases sa National Capital Region (NCR).
Ayon kasi sa OCTA Research group, patuloy pa rin kasi ang pagtaas ng mga naitatalang kaso ng COVID-19 sa Kamaynilaan kung kaya naman nagmungkahi ang mga eksperto na muling magpatupad ng istriktong lockdown upang masawata ang pagtaas ng COVID-19 cases.
Dagdag pa ng grupo, mas makabubuti umanong gawin na ang pagpapatupad ng dalawang linggong istriktong lockdown lalo na at tumataas din umano ang naitatala na mga kaso kung saan ang nakahawa ay ang kinatatakutang Delta variant.
Pero ang Department of Health (DoH), nanindigan na walang nangyayaring surge ng mga COVID-19 cases sa Kamaynilaan.
Ayon kay DoH-NCR Epidemiology Director Dr. Manuel Mape II, hindi pa umanong matatawag na surge ang nakikitang pagtaas ng COVID-19 cases subalit aminado sila na mayroon ngang pagtaas ng kaso sa ilang mga lungsod.
“We cannot call it a surge yet although we see that the number of cases are starting to increase in certain local government units,” saad ni Mape.
Dagdag niya, ang ilang mga local government units (LGU) na nakararanas ng pagtaas ng COVID-19 cases ay ang Las Piñas, Makati at San Juan.
“There is a slight increase in some LGU, but there are days where the number of new cases does not increase. Of course, we also have to factor in that there are late reports of confirmed cases,” sabi ni Mape.
Inilahad din niya na ang NCR ay nakapagtala na ng 25 cases ng Delta variant at sa kabuuan, 16 ang active cases, walo ang gumaling at isa ang namatay.
Ang kabuuang 25 cases ng Delta variant umano ay nasa mga lungsod ng Las Piñas na may isa, Makati na may isa, Malabon na may isa, Manila na may 10, Parañaque na may isa, Pasig na may pito, Quezon City na may isa, San Juan na may dalawa at Taguig na may isang kaso ng Delta variant.
Ayon kay Mape, mas kinakailangan umano ngayong istriktong sundin ang mga inilatag na minimum public health standards at nirerekomenda rin niya ang pagbabakuna upang makaiwas sa nakamamatay na sakit.
“The most important step now is to observe the health protocols and improve contract tracing to expand to third generation because we are seeing infections on second generation of close contact,” sabi ni Mape.
Sa ganang amin, mas kailangan sigurong magkaroon ng pagkakaisa ang ating mga health experts at DoH kung ano ba talaga ang sitwasyon ng mga kaso ng COVID-19 sa Metro Manila, dahil talaga namang nakababahala na ang nakikitang pagtaas ng kaso ng nahawahan ng Delta variant.
Kung hindi masasawata ito, malamang ay magkaroon na naman ng lockdowns na siguradong magpapahirap na naman sa mga mamamayan ng bansa.