ALERT LEVEL 2, HANGGANG KATAPUSAN NA?

NGAYONG Biyernes, ipinanukala ni Presidential Adviser for Entreprenuership Joey Concepcion na panatiliin na lamang ang Alert Level 2 sa buong bansa hanggang 31 Disyembre 2021 sa harap naman ng banta ng bagong Omicron variant.

Sinabi ni Concepcion na gumanda na ang kalagayan ng mga establisyemento matapos namang ipatupad ang unti-unting pagbubukas ng ekonomiya, partikular ngayong huling bahagi ng taon.

Ayon pa kay Concepcion, umabot na sa 80 porsiyento ang kita ng mga nagnenegosyo.

Nito ngang Huwebes, inaprubahan ng Inter-Agency Task Force (IATF) na ibaba na rin sa Alert Level 2 ang status ng Apayao mula sa Alert Level 3.

Nangangahulugan ito na lahat na ng lugar sa bansa ay nasa Alert level 2 na hanggang 15 Disyembre.

Inaasahan namang maglalabas muli ng bagong alert level ang IATF mula 16 hanggang 31 Disyembre 2021.

Umaasa naman ang lahat na tuloy-tuloy na ang pagsigla ng ekonomiya, bagamat may agam-agam pa rin dahil na rin sa banta ng Omicron variant.

Batay sa obserbasyon ng mga eksperto, halos nasa Alert Level 1 na rin ang Pilipinas sa harap naman ng mga aktibidad sa mga lansangan, mall at mga pampublikong lugar.

Samahan din natin ng dasal ang gumagandang ekonomiya ng bansa na magtuloy-tuloy na ito at hindi na rin tumaas ang mga kaso ng coronavirus disease (COVID-19).

Puspusan din ang ginagawang pagbabakuna ng pamahalaan para maprotektahan ang mga Pinoy sa banta ng COVID-19, partikular sa nakaambang bagong Omicron variant.

Mas magandang maging maingat pa rin ang bawat isa at sumunod sa mga umiiral na protocol kagaya ng pagsusuot ng mask at pagpapatupad ng physical distancing.

Abangan natin kung mananatili ang Alert Level 2 hanggang katapusan ng taon.