BAGONG TARGET: 1.8 MILYONG BAKUNA

VAX ROLLOUT NG GOBYERNO, NAGPAPATULOY…

Inihayag ng National Vaccination Operations Center (NVOC) nitong Lunes na target ng Pilipinas na makapagbakuna ng 1.8 milyong coronavirus disease (COVID-19) vaccine doses sa loob ng tatlong araw sa isasagawang panibagong malawakang national vaccination drive.

Ayon sa NVOC, isasagawa ang ang ikaapat na Bayanihan Bakunahan Program mula Huwebes, Marso 10, hanggang Sabado, Marso 12 at layon nitong mas mailapit ang bakunahan sa mga Pilipino sa pamamagitan ng pagdaraos nito sa mga lugar ng pinagta-trabahuhan at pagbabahay-bahay.

Dagdag nito, nagpapatuloy ang koordinasyon ng Department of Health (DoH) regional offices sa mga opisina ng gobyerno, eco-zones, at pribadong kompanya kaugnay ng gagawing pagbabakuna kontra COVID.

Sinabi naman ni Dr. Paz Corrales, medical consultant ng National Task Force Against COVID-19, na nakikipag-ugnayan na rin ang NTF sa Philippine Medical Association para muling tumulong sa pagbabakuna. Nananawagan din ang gobyerno para sa volunteers sa national vaccination days.

“Definitely we need volunteers for that. If ever there are volunteers, lumapit lang po sa local government units (LGU) at regional offices ng DoH,” saad ni Corrales.

Target ng gobyernong itaas sa 70 milyong Pilipino ang bakunado kontra COVID-19 sa katapusan ng Marso.

Sa pinakahuling tala, nasa higit 63.6 million na ang fully vaccinated sa bansa habang nasa 10.5 million naman ang may booster o dagdag na dose.

Pero ang bilang na ito, wala pa sa kalahati ng bilang ng mga indibidwal na kwalipikado nang tumanggap ng booster.

“Ang akala ng iba, hindi na kailangan bigyan ng booster dose. Kuntento na po sila sa dalawang doses. Pero ang sinasabi namin, ang booster dose ay added protection, dahil hindi po natin alam, baka magkaroon na naman po ng panibagong variant ang COVID-19, ito po ay added protection,” sabi ni Corrales.

Dagdag niya, hindi na isyu ang supply ng vaccines ngayon dahil dumating sa Pilipinas ang halos apat na milyong doses ng Pfizer vaccine para sa mga indibidwal na 12 years old pataas nitong Lunes ng umaga.

Ito ang pinakamalaking single-shipment ng bakuna kontra COVID-19 sa bansa.

Donasyon ito ng United States sa pamamagitan ng COVAX facility. Sa kabuuan, nasa 231.5 million COVID vaccine doses na ang na-i-deliver sa Pilipinas mula noong nakaraang taon.