BANTA NG COMELEC SA MGA KANDIDATO, SERYOSOHIN
MAY banta ang Commission on Elections (Comelec) sa mga kandidatong tumatakbo sa pagka pangulo at bise presidente na hindi dadalo sa debateng itinakda nito para sa eleksyon sa 9 Mayo 2022 at ito ay makatwiran.
Sa isang press conference ngayong Lunes, sinabi ni Comelec acting spokesperson James Jimenez na hindi papayagang makalahok sa e-rally ang mga kumakandidato walang partisipasyon sa debate.
Pormal nang pinirmahan ang memorandum of agreement para sa isasagawang “PiliPinas 2022 Debates 2022: The Turning Point.”
Idinagdag ni Jimenez na ito ang naging kasunduan ng poll body sa mga tumatakbo sa pagka presidente at bise presidente.
Nauna nang inilunsad ng Comelec noong 8 Pebrero 2022 ang isang Facebook page kung saan libre ang livestream ng mga kandidato na nagsasagawa ng mga campaign rally sa harap naman ng nararanasang pandemya.
Binibigyan ng mula tatlong minuto hanggang 10 minuto online airtime ang mga kandidato mula sa pangka pangulo, bise president, senador, at party-list group sa Campaign S.A.F.E. Comelec e-Rally Channel sa Facebook.
Aabot ng 10 minuto ang airtime para sa mga kandidato sa pagka pangulo at bise presidente tatlong beses sa isang araw, samantalang tatlong minuto naman para sa mga tumatakbong senador at ito ay maaaring gawin limang beses isang araw.
Samantalang, aabot naman sa tatlong minuto ang ibibigay para sa mga party-list group at ito ay maaaring gawin limang beses sa isang araw.
Ang bawat partido naman ay may 10 minuto kada araw na maaaring gawin tatlong beses sa isang araw.
Sinabi ni Jimenez na wala pang kumpirmasyon ang mga kandidato para sa nakatakdang debate.
Nakatakdang isagawa ang unang debate para sa mga tumatakbong president sa 19 Marso 2022, samantalang 3 Abril 2022 na isasagawa sa Sofitel Philippine Plaza Manila sa Pasay City.
Magsasagawa rin ng Town Hall Debates ang Comelec para sa presidente sa 23 Abril at 24 Abril naman para sa mga bise presidente.
Abangan na lang natin kung susunod ang lahat sa itinakda ng Comelec.