BILANG NG PINOY NA WALANG TRABAHO, BUMABA

BUMABA ang unemployment rate sa bansa matapos namang makapagtala ng 5.7 porsiyentong unemployment rate ngayong Abril 2022 o kabuuang 2.76 milyong Pinoy na walang trabaho.

Ito ay sa harap naman ng patuloy na pagbubukas ng ekonomiya sa bansa dahil sa pagbaba ng mga kaso ng coronavirus disease (Covid-19).

Sa isang press conference, sinabi ni National Statistician at Civil Registrar General Dennis S. Mapa na mas maliit ito kumpara sa 4.14 milyong walang trabaho sa kahalintulad na buwan noong isang taon at 2.87 milyon na tambay na mga Pinoy noong Marso 2022.

Idinagdag ni Mata na nabawasan din ang underemployment rate sa bansa matapos makapagtala ng 14 porsiyento kumpara sa 15.8 porsiyento sa kahalintulad na panahon noong 2021.

Nasa 6.40 milyon ang underemployment ngayong Abril. Base sa ulat ng PSA, umabot ang employment rate sa bansa sa 94.3 porsiyento kumpara sa 93.6 porsiyento noong Enero 2022.

Nangangahulugan ito na tinatayang 45.63 milyon ang may trabaho sa bansa.

Kung magtutuloy-tuloy ang pagbubukas ng ekonomiya, inaasahang madaragdagan pa ang mga Pinoy na mabibigyan ng trabaho.

Inaasahan namang magiging balakid sa pagganda ng ekonomiya ang patuloy na panggigiyera ng Russia sa Ukraine.

Apektado na kasi ang suplay at presyo ng produktong petrolyo, ganun din ang mga presyo ng mga bilihin.

Dahil sa mataas na bilihin at presyo ng langis, hindi sumasapat ang sweldo ng mga tumatanggap lamang ng minimum na sahod.

Dapat ay matigil na ang giyera nang sa ganun ay kasabay ng pagbabalik ng sitwasyon noong wala pang pandemya ay makaagapay ang mga Pinoy sa presyo ng bilihin at mas marami pa ang mabigyan ng trabaho.

Kumpiyansa naman ang lahat na matutugunan ni President-elect Bongbong Marcos ang isyu sa pagtaas ng mga bilihin at ng produktong petrolyo.