PAGLILINIS NG LISTAHAN NG 4PS, NARARAPAT

KAMAKAILAN ay inihayag ng Palasyo na iniulat ni Social Welfare Secretary Erwin Tulfo kay Pangulong Ferdinand “Bongbong” Marcos Jr. na aabot sa 1.3 milyon ng kabuuang 4.4 milyong benepisyaryo ng Pantawid Pamilyang Pilipino Program (4Ps) ang tatanggalin sa listahan.

Kahapon, tahasang sinabi ni Tulfo na hindi na pasok sa programa ang ibang benepisyaryo ng 4Ps kayat kailangan na silang tanggalin.

Ayon kay Tulfo, base sa ginagawang pagrerepaso ng mga miyembro ng DSWD, may mga benepisyaryo ng 4Ps na nagmamay-ari na ng magagandang appliance kagaya ng 72-inch flat-screen TV, double door refrigerator at aircon.

Idinagdag ni Tulfo na nangangahulugan lang ito na gumanda na ang buhay ng mga miyembro ng 4Ps.

Tiniyak naman ni Tulfo na aabisuhan ang mga tatanggalin sa loob ng ilang linggo.

Ayon pa kay Tulfo, dadaan pa rin sa proseso ang gagawing paglilinis.

Inaasahang aabot sa P15 bilyon ang matitipid ng pamahalaan sa gagawing paglilinis.

Sinabi pa ni Tulfo na papalitan naman ito ng bagong mga kwalipikadong benepisyaryo.

Samantala, sinabi ni Tulfo na iniimbestigahan na ang ulat na nabigo ang DSWD na maipamahagi ang P2 bilyong ayuda.

Sinabi ni Tulfo na aabot sa P1.7 bilyon ang ibinalik ng DSWD sa Bureau of Treasury.

Ayon kay Tulfo, maraming benepisyaryo ang nagrereklamo matapos hindi makatanggap ng ayuda.

Nauna nang pinuna ng Commission on Audit (COA) ang DSWD matapos ang kabiguan na maipamahagi ang Social Amelioration Program (SAP) sa panahon ni dating Secretary Rolando Joselito Bautista.

Dapat ay malinis na ang listahan ng 4Ps para matiyak na ang mga karapat-dapat lamang ang mabigyan ng tulong pinansyal.

Maganda ang hangarin ni Tulfo kayat dapat ay suportahan ng lahat.