MGA NAIS LUMAHOK SA HALALAN, DUMARAMI
ISANG araw bago magtapos ang voter’s registration ngayong Sabado, 23 Hulyo 2022, dagsa pa rin ang gustong makahabol para sa pagpaparehistro at ito’y magandang palatandaan na mas maraming Pinoy ang nais makilahok sa halalan.
Sinabi ng Commission on Elections (COMELEC) na umabot na sa 2,119,878 ang nagpagrehistro para sa Sangguniang Kabataan (SK) at barangay election.
Idinagdag ni COMELEC Acting Spokesperson John Rex Laudiangco na nalagpasan na ng poll body ang target nito na dalawang milyong bagong botante.
Idinagdag ni Laudiangco na umabot na sa 1,326,415 na edad 15 hanggang 17 ang nagpatala, samantalang 680,497 naman ang edad 18 hanggang 30 at 112,966 ang edad 31 pataas.
Ayon kay Laudiangco, base sa kasaysayan ng COMELEC, umaabot lamang sa humigit-kumulang isang milyong ang nagpapatala.
Aniya, dumoble pa ang nagpaparehistro matapos makapagtala ng mahigit dalawang milyon.
Magtatapos ang voter’s registration ngayong Sabado, 23 Hulyo 2022.
Inamin naman ni Laudiangco na umaabot lamang sa 300 kada araw ang kayang iproseso ng COMELEC.
Sinabi pa ni Laudiangco may mga COMELEC registration site ang nakapagproseso ng mahigit 600 botante.
Nakatakdang ganapin ang SK at barangay election sa 5 Disyembre 2022.
Ipinaliwanag ni Laudiangco na sa ilalim ng Republic Act 8189 bawal na ang magparehistro 120 araw bago ang eleksyon.
Tiniyak naman ni Laudiangco na sapat pa ang panahon ng COMELEC para paghandaan ang paparating na halalan.
Idinagdag ni Laudiangco na may pondo rin ang COMELEC para sa kakailanganing paghahanda bago ang nakatakdang halalan.
Sinabi pa ni Laudiangco na tuloy lamang ang paghahanda sa kabilang ng pagsusulong ng mga mambabatas na ipagpaliban ito.
Ayon kay Laudiangco, magiging manual lamang ang gagawing eleksyon, hindi kagaya ng nakaraang halalan noong Mayo.
Magandang senyales na mas maraming Pinoy ang kinikilala ang kanilang karapatan para makaboto.