PAG-AKSYON SA LINDOL, NAGING MABILIS
MABILIS ang naging pag-aksyon ng pamahalaan sa nangyaring magnitude 7.0 na lindol sa bansa at dapat ay laging ganito ang pagkilos ng mga kaukulang ahensiya ng pamahalaan.
Agad na nagpatawag ng press conference si Pangulong Ferdinand “Bongbong” Marcos Jr. sa Palasyo kasama sina Philippine Institute of Volcanology (Phivolcs) Director Renato Solidum, Interior Secretary Benhur Abalos at Defense of National Defense (DND) officer-in-charge Jose Faustino Jr.
Sinabi ni Marcos na hindi muna siya pupunta sa Abra para hindi makasagabal sa ginagawang operasyon ng mga lokal na pamahalaan.
Idinagdag ni Marcos na bilang dating gubernador, alam niya na tutok ang mga lokal na pamahalaan sa mga ginagawang aksyon at magiging sagabal lamang siya kung sasabayan ng kanyang pagbisita.
Tiniyak naman niya na bibisita siya sakaling posible na ngayong Huwebes, 28 Hulyo.
Kasabay nito, sinabi ni Marcos na hindi siya magdedeklara ng state of calamity sa kabila nang nangyaring malakas na lindol.
Ipinaliwanag ni Marcos na dapat ay tatlong rehiyon ang apektado ng isang kalamidad bago makapagseklara ng state of calamity.
Aniya, sa kasalukuyan, Region 1 at Cordillera Administrative Region (CAR) lamang ang napinsalang mga rehiyon.
Tiniyak naman niya na posibleng magbago pa ang desisyon niya sakaling may mga madagdag na impormasyon na kinakailangan ng pagdedeklara ng state of calamity.
Pinaboran naman ni Marcos ang pagpasa ng panukalang batas na nagtatayo kg Department of Disaster Resilience.
Idinagdag ni Marcos na posibleng mapadalas ang mga sakuna sa bansa kaya kailangang palakasin ng pamahalaan ang kapabilidad laban sa mga kalamidad.
Sa press conference, iniulat ni Abalos na apat na ang naiulat na nasawi, samantalang 60 na iba pa ang nasugatan matapos ang magnitude 7.0 na lindol.
Sinabi ni Abalos na batay sa ulat na kanyang tinanggap, 29 kalsada, tatlong tulay; 173 gusali ang pawang napinsala sa nangyaring malakas na lindol.
Idinagdag ni Abalos na nakapagtala rin ng 31 landslide sa iba’t ibang lugar sa Luzon.
Ayon pa kay Abalos, 15 lalawigan, 15 lungsod, 280 munisipalidad at 6,756 barangay sa Region I, II at Cordillera Administrative Region (CAR) ang apektado ng lindol.
Sa briefing, iniulat ni Solidum na ang Vigan ang pinaka napinsala ng magnitude 7.0 na lindol.
Nagbabala rin si Solidum na magpapatuloy ang mga landslide sa harap ng mga pag-ulan.
Aniya, dapat ding masuri ang mga bahay at gusali na naapektuhan ng lindol.
Sinabi pa ni Solidum na wala namang inaasahang tsunami sa kabila ng napaulat na malalakas na pag-alon.
Naway hindi naman malala ang naging pinsala ng lindol at dapat ay mabigyan ng tulong ang mga Pinoy na apektado ng kalamidad.