WHO, NAGBABALA LABAN SA MONKEYPOX

Nagbabala ang World Health Organization (WHO) nitong Huwebes sa mga grupo na higit na apektado ng monkeypox virus — ang men who have sex with men -- na limitahan ang kanilang sexual partner sa harap nang dumadaming kaso ng impeksyon.

Ayon kay WHO chief Tedros Adhanom Ghebreyesus, ang pinakamabisang paraan para maprotektahan ang sarili laban sa naturang virus ay bawasan ang “risk of exposure.”

Nitong nakaraang Sabado, idineklara ni Ghebreyesus na isa nang global health emergency ang monkeypox dahil sa pagkalat nito sa 78 bansa, at mayroon nang 18,000 kaso.

Sa naturang bilang ng mga kaso, 98 percent ay ang mga lalaki na nakipagtalik sa kapuwa nila lalaki.

“For men who have sex with men, this includes, for the moment, reducing your number of sexual partners, reconsidering sex with new partners, and exchanging contact details with any new partners to enable follow-up if needed,” ayon sa opisyal ng WHO.

Nitong nakaraang Mayo nang magsimulang magkaroon ng kaso ng monkeypox sa labas ng West at Central African kung saan endemic ang virus.

Ayon kay Ghebreyesus, 70 percent ng kaso ay naitala sa Europe, at 25 percent sa Americas. Lima na ang naitalang nasawi at nasa 10 porsiyento ng mga tinatamaan ng virus ang dinadala sa ospital.

Sa pag-aaral na nalathala sa New England Journal of Medicine nitong nakaraang linggo, 98 percent ng mga infected ng naturang virus ay mga gay o bisexual men, at 95 percent sa kanila ay nakuha ang virus sa pamamagitan ng sexual activity.

Nilinaw ng mga ekperto na naipapasa o maaaring mahawa ng monkeypox sa pamamagitan ng close at physical contact. Hindi pa ito itinuturing sexually transmitted infection (STI).

Bukod sa lagnat at pananakit ng katawan, ang mga tinatamaan ng monkeypox ay nagkakaroon ng pamumula, at nagtutubig na may maliliit na sugat sa balat na tila bulutong.

Paalala pa ng mga eksperto, maaaring maapektuhan ng virus ang isang komunidad dahil maipapasa rin ito sa “regular skin-to-skin contact, and also through droplets or touching contaminated bedding or towels in a household setting.”