DAPAT TULUNGAN
Nitong nakaraan ay nanawagan ng tulong kay Pangulong Ferdinand Marcos Jr. ang isang grupo ng mga mangingisda dahil sa nararanasan umano nilang panggigipit sa mula sa mga Chinese sa Scarborough Shoal.
Ayon sa mga mangingisda, nawawalan na sila ng kanilang hanapbuhay dahil na rin sa hindi na sila makapangisda sa sarili nilang lugar.
Idinaan pa nga ng mga mangingisda sa isang mapayapang protesta sa Boy Scout Circle sa Quezon City ang Samahang Nagkakaisang Mangingisda ang kanilang hinaing at nararanasan nilang gutom at pananakop.
Kasama nila ang limang mangingisda mula sa Masinloc, Zambales.
Ayon sa kanilang convenor na si Ron Delos Angeles, nalulugi na raw ang mga mangingisda sa Masinloc dahil bukod sa mataas na presyo ng gasolina, kaunti rin ang kanilang nahuhuling isda.
Ayon naman sa isa pang mangingisda, hinaharang daw sila ng mga barko ng China para hindi makapasok sa Scarborough Shoal at binanggit din nila na ang pinakahuling insidente ay nito lamang nakaraang buwan.
Nakiisa rin sa programa ang 20 mangingisda mula naman sa Navotas City.
Nag-caravan naman ang grupo papunta sa Liwasang Bonifacio sa Maynila para magdaos din ng maikling programa.
Hindi naman inbalido ang hinaing ng ating mga mangingisda dahil sila ang mas nakakaalam ng kanilang mga karanasan kaugnay sa panggigipit na ginagawa ng China sa kanila.
Sana lamang ay mapakinggan ng Pangulo ang kanilang panawagan, dahil bukod sa ating mga magsasaka, ang ating mga mangingisda rin ang nagbibigay ng kabuhayan sa ating bansa.
Kaya marapat lamang na tulungan sila.