PUBLIC SCHOOL TEACHER, TIKLO SA PAGTUTULAK NG DROGA
Inaresto ng mga tauhan ng Laguna Police ang isang elementary public teacher na nagtutulak ng ilegal na droga at nasabat mula sa guro ang 16 na sachet ng hinihinalang shabu sa isang buy-bust operation noong November 18.
“Ang modus niya po is kukuha po doon sa Bay, Laguna then ibabagsak po dito sa Sta. Cruz, Laguna. After niya po sa school magturo, then sa gabi, ang modus niya po is magbenta po ng pinagbabawal na droga,” saad ni Police Major Gabriel Unay, Chief of Sta. Cruz Police.
Bukod sa pagtutulak ng droga, may nadiskubre pa ang pulis sa umano’y illegel aktibidad ng naarestong guro.
“Kukuha po siya ng babae or makarelasyon niya then papagimitin niya ng pinagbabawal na droga yung partner niya. Then after that, ‘yun na po yung magsisilbing kabayaran po nung ano---. Nakakalungkot isipin talaga na public school teacher, which is tinuturuan niya po is elementary students, then sa gabi, ‘yun po yung nagiging trabaho niya. Parang teacher by day, pusher by night,” sabi pa ni Unay.
Labis naman ang pagsisisi ng guro na may mensahe sa kanyang mga estudyante. Sambit nito, “sa lahat ng mga naging estudyante ko, pasensya na kayo at bigla akong nawala.”
“Ito ako, nakakulong sa isang pagkakamali na sana kapulutan niyo ng aral,” dagdag niya.
Sa ibang balita, isang holdaper ang naaresto nang pumalag ang isang babae na kabilang sana sa kaniyang mabibiktima sa isang spa sa Cavite.
Kinilala ng pulisya ang suspek na si Jeffrey Encarnacion, isang AWOL na miyembro ng Philippine Marine Corps.
Pinuntirya ni Encarnacion ang isang spa sa Trece Martires kung saan nagpamasahe, manicure at pedicure pa muna ang suspek bago nagdeklara ng holdap.
Pero napansin ng therapist na si Benaliza Pulgo na may kakaiba sa hawak na “baril” ni Encarnacion kaya nanlaban siya.
“Nakabalot po siya sa may medyas na itim tapos maliit lang siya. Sabi ko magaan lang tingnan… mukhang peke to. Tapos ‘yung habang kinuha niya cellphone namin at tinatalian ‘yung kasamahan kong isa, ayun du’n na ako naglakas-loob na tulakin siya,” ani Pulgo.
Dito na raw tumulong ang iba pa niyang kasama. “Hinampas ko po siya ng bat sa ulo tapos nahilo po siya at nanghina. Dito na po siya nahuli ng mga pulis,” saad ni Mark Gaan.