HINDI KAMI NANINIWALA! – DFA

“As far as the DFA is concerned, we have no reason to doubt the Philippine Coast Guard’s account of the incident,” sabi ni Foreign Affairs spokesperson Tess Daza.

Kung matatandaan, nitong Martes ay naghain ng diplomatic protest ang Pilipinas laban sa China matapos iulat ng PCG na tinutukan ng Chinese coast guard ng “military-grade” laser light noong February 6 ang isa nilang barko.

Nakaranas umano ng pansamantalang pagkabulag ang ilan sa mga crew ng BRP Malapascua.

Kinondena rin ng Pilipinas ang ginagawang “shadowing, harassment, dangerous maneuvers and illegal radio challenges” ng mga sasakyang pandagat ng China.

Itinanggi ng China ang alegasyon at sinabing panukat lang sa distansiya sa ibang sasakyang pandagat ang paggamit ng laser ng kanilang barko.

“During that process, the China Coast Guard ship used hand-held laser speed detector and hand-held greenlight pointer to measure the distance and speed of the Philippine vessel and signal directions to ensure navigation safety,” sabi ni Chinese Foreign Ministry spokesman Wang Wenbin sa regular press conference nitong Miyerkules.

“We need to highlight the fact that the China Coast Guard ship did not direct lasers at the Philippine crew, and the hand-held equipment does not inflict damage on anything or anyone on the vessel,” paliwanag pa niya.

Iginiit din ng China na teritoryo nila ang Ayungin shoal, o Ren’ai Reef, na parte umano ng kanilang Nansha Islands, na tinatawag naman ng Pilipinas na Spratly Islands.

Nagpahayag naman ng pagsuporta sa Pilipinas ang United States, Japan, Canada, Australia, Denmark, Germany at United Kingdom laban sa mga mapanghamong galaw ng China sa pinagaagawang teritoryo.