DAPAT IMBESTIGAHAN
Nitong nakaraan ay napabalitang mayroong isang chartered flight patungong Dubai na umano’y hindi dumaan sa inspeksyon kaya naman nagsasagawa na ng imbestigasyon ang Manila International Airport Authority (MIAA) kaugnay sa insidente.
Batay sa paunang imbestigasyon, sinabi ng MIAA na kumpleto sa entry-exit clearance ang flight N9527E noong Pebrero 13 mula sa Civil Aviation Authority of the Philippines (CAAP).
Mayroon din umano itong aircraft exit clearance mula sa police Aviation Security Group (AVSEGroup) at dumaan sa MIAA para sa pagpasok ng mga sasakyang lulan ang mga pasahero papunta sa Balagbag ramp.
Ito ang mga paunang impormasyong nakalap ng MIAA mula sa Globan Aviation Corporation na ground handling company ng naturang chartered flight.
Dumaan din sa Bureau of Immigration (BI) ang mga pasahero, ayon sa MIAA.
Pero nanindigan ang AVSEGroup na hindi dumaan sa kanilang pre-flight inspection ang chartered flight bago makalipad.
“We were not allowed to conduct the pre-flight inspection, that’s why I reported this incident to the concerned agency,” sabi ni AVSEGroup chieif Col. Rhoderick Campo.
Ayon kay Campo, mandato ng AVSEGroup na gawin ang preflight inspection lalo’t may intelligence report na natanggap ang kanilang opisina.
“There was an intelligence report from a confidential informant that there will be undocumented aliens who will travel going to other countries,” ayon kay Campo.
Humiling na ang AVSEGroup ng full investigation sa MIAA, Office for Transportation Security, CAAP, at Bureau of Immigration kaugnay ng insidente.
Tumanggi rin namang magbigay ng pahayag ang operations manager ng Globan Aviation Corporation pero handa umano silang makipagtulungan sa imbestigasyon.
Hindi dapat palampasin ang insidente na ito, dahil hindi lamang seguridad ng ating mga paliparan ang nakasalalay dito kundi maging ang ating imahe bilang isang bansa na may matibay na aviation processes upang masiguro ang kaligtasan ng lahat.