MAIN MENDOZA

Hiligaynon - - Cover Story -

ISA na ka recording artist si Maine Mendoza. Nagpirma na sia sa isa ka recording contract sa Universal Records Philippines (URPH). Kaupod ang manager niya nga si Rams David, nagpirma sang kontrata si Maine sa General Manager sang URPH, si Kathleen Dy-Go.

“We’re very happy to welcome Maine into the Universal Records family, and very excited to be working with her for her upcoming projects,” siling ni Ms Kathleen. Wala ginsiling sang URPH kon pila ka albums ukon pila ka tuig ang kontrata nga ginpirmahan ni Maine. Ginsiling lang nila nga ginahanda na nila ang himuon nga album ni Maine, nga i-produce ni Mr. Ito Rapadas.

Sa interbyo kay Maine ni Cata Tibayan sa “Chika Minute”, ginpamangkot sia kon paano sia nagahanda sa iya recording. Siling ni Maine nga nagayuhom kag masnahan nga excited gid sia, magakuha sia kuno sang voice lesson agod makahanda sing maayo. Ang matuod nga madamo ang nakatalupangod nga may matahom naman nga tingog si Maine, ugaling daw wala lang sia sang kaisog sang buot agod sudlon ang recording.

Nagsugod nga makilala si Maine Mendoza bilang Dubsmash Queen. Diri kag natalupangdan sia kag ginkuha sang Eat Bulaga. Diri man sila nag-meet ni Alden Richards kag sang July 16, 2015, nabun-ag ang AlDub love team nga ginkakunyagan sang mga fans sa bug-os nga pungsod.

Sa interbyo sa iya sang Eat Bulaga, ginsiling niya nga indi sia kahibalo magkanta. Indi man sia kahibalo mag-arte, kag ang nahibal-an lang niya amo ang magpalaw-ay sang nawong. Indi sia kahibalo magkanta pero sia ang naghimo sang lyrics sang theme song sang first solo movie nila ni Alden, ang Imagine You & Me, nga nangin blockbuster hit. Si Maine man ang nagrekord sini kag nangin first single niya, pero tubtob sa Eat Bulaga lang ato. Kag sining karon lang, kaupod si Maine nga nag-concert kaupod ang Broadway Boys nga produkto man sang Eat Bulaga. Sila sanday Joshua Lumbao, Joshua Torino, Benedict Aboyme kag Francis Aglabtin. Una na nga nag-concert ang Broadway Boys kaupod sanday Senador Tito Sotto, Allan K, Alden Richards, Wally Bayola, Joey de Leon, Paolo Ballesteros, kag siyempre kaupod gihapon si Maine.

Gani karon, indi masiling ni Maine nga indi sia kahibalo magkanta. Ayhan wala lang sia sang kaisog sang buot. Bag-o magsugod ang Dabarkads Concert series, nag-post anay si Maine sa Twitter nga nangin top trending. Siyempre, suportado si Maine sang Dabarkads. Nagtan-aw sa iya sanday Vic Sotto, Joey, Allan, Alden, Pia Guanio, Pauleen Luna, Luane Dy, Ryzza Mae Dizon kag Baeby Baste. Nagabot man sanday Jose Manalo, Paulo kag Wally.

Bagay gali sa boses ni Maine ang mga kanta sang Carpenters nga ginkanta nila sang Broadway Boys. Ini ang Close To You, Top of the World, We’re Only Just Begun, kag Yesterday Once More. Kag may “plus” pa nga ginhimo si Maine. Ini ang pagtokar niya sa nagkalainlain nga klase sang drums nga natun-an kuno niya sa pagtan-aw lang sang video.

Matapos ang concert, amo na lang ang pasalamat ni Maine, ginapamalhas sia kuno bangod sa nerbios. Indi niya malikawan nga magbatyag sang nerbios bisan nga nahibal-an niya nga suportado sia sang AlDub fans. Kinahanglan lang ni Maine ang kaisog sang buot agod mapagua niya sing lubos ang iya talento. Isa lang ang napamatudan diri. Maine is a very talented girl.—O

Newspapers in Tagalog

Newspapers from Philippines

© PressReader. All rights reserved.