PAULINE MENDOZA

Hiligaynon - - Cover Story -

AMAT-AMAT na nga nakilala si Pauline Mendoza sa showbiz, sugod sang mahatagan sia sang role sa hit nga serye nga Kambal Karibal, kaupod sanday Kyline Alcantara, Bianca Umali kag Miguel Tanfelix. Isa sia ka contract star sang GMA-7 kag ang tunay niya nga ngalan amo ang Pauline Bianca Cruz Esquieres.

Tubong Lucban, Quezon si Pauline pero madugay naman sila nga nagapuyo sang iya pamilya sa Marikina City. Sa edad nga 18, senior high na ang dalaga kag plano kuntani niya nga magkuha sang kurso nga arkitekto, pero masyado ka time consuming ini nga kurso kag makasablag ini sa iya pagka-artista. Gani buko na lang niya nga magkuha sang Theater Arts sa UP.

Tatlo ka tuig na sia sa GMA-7 Artist Center kag wala naman sia ginakadulai sang project gani daku man ang pasalamat niya sa Kapuso Network sanglit wala sia ginpabay-i. Actually, bag-o sia nagsaylo sa Kapuso Network, sa ABS-CBN sia nag-workshop. Sa Star magic, ginhatagan sia kuno sang libre nga workshop kag ginhatagan man sia sang project, pero indi kuno sia seryoso nga mag-artista sadto nga panahon sanglit nagaeskwela pa sia. Gintapos anay niya ang elementary kag high school bag-o nag-full time sa showbiz.

Sa GMA na sia ginhatagan sang 5 years contract kag nakatatlo na kuno sia ka tuig karon. Una niya nga nangin project sa Kapuso Network ang Little Nanay, That’s My Amboy, My Love Frome The Stars, Alyas Robin Hood, season 1, Juan Happy Love Story, Dear Uge, Wagas, kag Tadhana, Pero ang ginakabig niya nga big break amo ang serye nga Kambal Karibal. Ini nga serye nangin hit kag katapat sang mga serye nga La Luna Sangre kag Bagani sa ABS-CBN.

Bata pa sang mag-umpisa sa showbiz si Pauline. Tatlo ka tuig pa lang sadto ang iya edad kag madamo sia sang mga product endorsements pareho sa Jollibee series. Apang nag-untat anay sia agod tapuson ang iya studies sa elementary kag high school. Gani 16 years old na sia sang magseryoso sa iya showbiz career. Siling gani sang mga nakatan-aw sang Kambal Karibal, madali kuno sia mag-arte nga nagahibi. Wala na sia sing ginhimo sa serye kundi ang maghibi bilang napatay nga kapid kag nagmurto. Siling niya, normal lang sa iya nga madali magpatulo sang luha sanglit ginhanas naman sila sa workshop. Madamo naman sia sang workshop nga gin-entrahan, naluyagan kuno niya ang mag-workshop sanglit madamo sia sang natun-an labi na sa akting. Nagaisahanon nga anak si Pauline kag ang tatay niya isa ka marketing manager kag ang nanay niya isa sadto ka manager sang isa ka bangko. Karon, wala na kuno nagatrabaho ang iya mommy sanglit may breast cancer ini nga stage 3. Pero karon daw naghaganhagan ang ginabatyag kag nagagamit na lang sang herbal medicines ang iya mommy. Samtang, sa pag-ulolupod nanday Pauline, Bianca, Kyline kag Miguel sa Kambal Karibal, indi malikawan nga makaangkon sang mga tsika nga kuno indi sila maghinangpanay. Gina-bash sila sang mga supporters sang kada isa. Sanday Bianca kag Miguel gina-link kag daw naumid si Pauline. Si Kyline naman na-boo sang mga fans sang mag-show ini sa isa ka mall sa Iloilo sa indi mahibal-an nga kabangdanan. Para kay Pauline, wala sia labot sa problema gani dedma lang sia kag wala lang niya ginasapak ang mga intriga. Pero gin-aku ni Pauline nga mas close sia kay Bianca sangsa kay Kyline. Luyag kuno makatrabaho ni Pauline ang iya ginaidolo nga si Mariane Rivera. Belib man sia kay Dingdong Dantes nga nakatrabaho naman niya sa Alyas Robin Hood. Super nice kuno ini kag sobra kabuot. Sa tatlo ka tuig niya nga pag-work bilang artista, nakabakal naman sia sang iya dream car. Pray na lang niya nga mag-ayo na sing lubos ang mommy niya.—O

Newspapers in Tagalog

Newspapers from Philippines

© PressReader. All rights reserved.