Kahalagahan Ng Lifelong ...
PAANO kung mas pinahalagahan ng ating mga magulang ang kanilang pera kaysa sa ating edukasyon? Paano kung nagdesisyon sila noong nakita nilang marunong na tayong magsulat at magbasa na sapat na iyon? Ayos lang ang basic literacy, pero para sa mas nakararami at dahil sa dami ng impormasyong sumusulpot sa ngayon, kailangan ang dagdag at patuloy na pag-aaral para mas handa sa mga hamon ng buhay. Salamat sa ating mga magulang na nagtrabaho at nagsakripisyo para tayo mapag-aral.
Mula sa simpleng pagbabasa, pagsusulat at pagbibilang, pinagaralan naman natin ang mas komplikadong mga lebel at paksa. Maaaring mahirap sukatin ang skills at mga kaalaman na natutuhan natin sa pagdaan ng mga taon, pero hindi pa rin ito masasabing sapat na. Patuloy kasing lumalago ang body of knowledge. Maraming mga bagong kaalaman na dapat suriin at pag-isipan.
Ang pagtuturo sa mga bata at paghimok na pagbutihin nila ang kanilang pag-aaral ay mas malaking hamon ngayon kaysa noong sampu hanggang 15 taon na ang nakararaan. Parami nang parami ang mga mag-aaral na nawawalan ng interes sa pag-aaral. Ang mga nakatatanda at ang mga bata na rin ay umaamin na dahil ito sa distractions tulad ng gadgets, shopping
malls, TV, pati na rin ang maagang pakikipagrelasyon, at kawalan ng superbisyon ng magulang.
Marami sa mga estudyanteng hindi seryoso sa pag-aaral ang pumapasa naman at nakakapagtapos. Sapat na ba ang diploma at passing grades? Kung ang bawat aspekto ng buhay ay nangangailangan ng critical thinking para sa mainam na pagpapasiya, ano ang pagbabatayan ng mga kabataang nasanay na lamang sa mga bagay na komportable at mabilis? Balang araw, magtatrabaho sila. Ang karamihan ay magpapakasal at bubuo ng sariling pamilya. Ire-require nga sila na mag-attend ng trainings at seminars, pero hindi naman matututuhan ang lahat sa ilang araw lamang. Iba pa rin ang patuloy at regular na pagbabasa, panonood, at pakikinig sa informative videos and
programs. Maraming resources sa halos lahat ng paksa, pero kung nasanay naman ang isang tao na hindi nagdadagdag ng kaalaman tungkol sa mga paksang pakikinabangan niya, paano siya mahihimok kapag may edad na siya?
Himukin ang mga bata na magkaroon ng study habit at maging interesado sa pagtuklas ng mga bagong impormasyon habang maaga – kung kailan sila ay bata pa, curious and
teachable. Ipaunawa sa kanila ang kahalagahan ng patuloy na pag-aaral kahit pa pagkatapos makakuha ng college diploma. Hindi sapat ang marunong lang tayong magbasa at magsulat. Hindi sapat ang college diploma. Kailangan ang patuloy na pag-aaral at pagtuklas ng mga bagong impormasyon. Sa ganitong paraan, maraming pagkakamali ang maaari nating maiwasan at makakakuha tayo ng mga bagay na magpapalago sa iba’t ibang aspekto ng ating buhay. Be a lifelong learner!