Paano Ba Maging Mabuting Ama?
Lilia Borlongan-Alvarez
WALANG makahihigit sa sakripisyo ng isang ina – simula sa pagdadala ng sanggol sa kanyang sinapupunan, hanggang sa panganganak, pagpapasuso, pagpapalaki at pagsubaybay sa kanyang anak hanggang sa kaya na niyang mabuhay mag-isa. May kasabihang “nasa hukay ang isang paa” ng isang babaeng nagsisilang ng sanggol. (Ibig sabihin, nakahandang ilaan ng babae ang kanyang buhay para sa kanyang anak.)
Ngunit, hindi rin matatawaran ang papel ng isang ama sa pagpapalaki sa kanyang mga anak – kapwa sila kailangan ng mga anak lalo na sa kanilang formative years. Para sa mga amang ibig magkaroon ng makabuluhang papel sa buhay ng kanilang anak, narito ang ilang tips ni Scott Shelby na hango sa sarili niyang karanasan na siyang batayan ng kanyang artikulong “10 ways to be a great dad” (www.parents.com):
Maging mabuting asawa. “Gawing matibay ang pagsasama ng iyong kabiyak. Kailangan ng isang bagong silang at mga lumalaking bata ang isang tahanan kung saan nagmamahalan ang mga miyembro ng pamilya…maging active participant bago at pagkatapos manganak ng iyong asawa,” ani Shelby. Bigyan ang iyong asawa ng oras para sa kanyang sarili.
Para sa mga amang may bagong silang na sanggol, maaaring bantayan ang anak habang umiidlip ang iyong asawa. “Sapagkat abala siya sa pag-aaruga ng sanggol, wala na siyang oras para alagaan ang sarili. Kaya, maaari niyang bisitahin ang kanyang ina o isang kaibigan…sinisiguro ng isang mabuting ama na walang burnout na mararanasan ang kanyang asawa,” wika ni Shelby.
Samahan ang iyong asawa habang siya’y nagpapasuso sa gabi o madaling-araw. “Kailangang bumangon ang asawa ko kahit alas dos ng umaga kapag nagutom ang bagong silang na anak namin noon, sapagkat siya’y nagpapasuso. Ngunit ako’y
bumabangon din para tabihan siya… nagkukuwentuhan kami, at pagkatapos ay ipakakarga niya sa akin ang bata para sa ito’y dumighay…sa ganitong paraan, napapalapit kami ng aking asawa sa isa’t isa…” ayon kay Shelby.
Maging mapagmahal sa inyong mga anak habang sila’y
lumalaki. “Ang mga salitang ‘Daddy loves you’ ay walang kabuluhan para sa maliliit na bata…ang kailangan nila’y mapagmahal na haplos, pagyakap, paghalik…masaya ang isang batang alam na siya’y mahal – yaong batang tumatakbo sa iyo sa oras na ikaw’y makita,” ani Shelby. “Makapangyarihan ang haplos ng isang ama – ipinahahatid nito ang mensahe ng pag-ibig na hindi maipahihiwatig ng mga salita. Ngunit hindi kasama ang ‘high fives’ – ito’y tanda ng pagdiriwang, hindi ng pagmamahal.” Kailanma’y huwag abusuhin ang inyong anak at asawa.
Huwag tawaging “tanga” o “bobo” ang inyong anak o asawa, o maging pisikal sa kanila kahit minsan, ang payo ni Shelby.
Mag-enjoy, makipaglaro sa mga anak. Samantalahin ang napakaigsing panahon na kasama ninyong maglaro ang inyong mga anak. “Lumiban sa trabaho kung maysakit ang inyong anak. Dalhin sila sa amusement park. Sunduin sila sa eskwela. Hindi kayo magsisisi at sasabihin sa mga huling oras ninyo dito sa mundo: ‘sana’y mas maraming oras ang ginugol ko na kasama kita,’” wika ni Shelby.