Mga Pampasuwerteng...
Nestor Cuartero
USUNG-USO ang pagreregalo ng mga pampasuwerte sa kahit anong okasyon, birthday man ito, Pasko, Bagong Taon, o wedding anniversary. Sa isang interview ay sinabi ni Master Hanz, kilalang feng-shui expert, na marami ang naniniwala na nakatutulong sa pag-akit ng suwerte sa iba’t ibang larangan ang mga Feng Shui charms at practices.
Narito ang ilan sa mga tradisyonal na pampasuwerte na maaaring ipanreglao:
Number eight (8) –Kapag binasa sa Intsik ang numerong 8 ay “ba” na malapit sa tunog ng “fa” na ang ibig sabihin sa kanila ay kasaganaan o kayamanan. Ang numerong 8 din ay may perpektong pantay na hugis na para sa mga Intsik ay nagpapakita ng balance na tamang-tama para sa feng shui.
Mystic Knot – Gawa ito sa anim (6) na infinity symbols. Tinatawag din itong “endless knot” o “eternal knot.” Ito ay tinatawag na “Pan Chang” knot. Maaaring i-display lamang ang mystic knots pero ang iba ay
nagdadagdag pa ng mga charms at dekorasyon dito. Ayon sa paniniwala, ang pagkakaroon ng
mystic knot ay nakakapagtanggal ng kamalasan, pati na rin mga sakit at mailalayo rin ang nagmamay-ari nito sa kapahamakan.
Laughing Buddha – Ang Happy, Hotei o Traveling Buddha, o mas kilala bilang “The Laughing Buddha” ay hindi pangkaraniwan ngunit kilala at mahal ng mga tao. Kapag ikaw ay mayroon nito, pinaniniwalaan na magkakaroon ka ng kayamanan, hindi lamang
ang may-ari nito, pati na rin ang kanyang mga anak. Dagdag pa rito, pinaniniwalaan din na nakapagdadala ito ng maganda at masayang enerhiya at blessings kaya madalas itong makita sa mga establisyimento at tahanan.
The Lucky Cat – Ang pampasuwerteng ito ay nagmula sa Japan ngunit kinuha ito ng mga Feng Shui practitioners para sa kayamanan at kasaganaan. Ayon sa mga eksperto, dapat ang isang tao ay may lucky or money cat dahil ito ay likas sa kanyang kalooban at hindi lamang dahil sinabi ito ng mga feng shui experts.
Fu Dogs – Kilala rin sila bilang Imperial Guardian Lions. Madalas silang makikita sa labas ng bahay ng mga mayayamang tao dahil ito ay nagsisilbi ring simbolo ng estado sa buhay. Kapag may isang pares nito sa harapan ng iyong tahanan, pinaniniwalaan na poprotektahan ka nito mula sa mga masasamang tao tulad ng mga magnanakaw.
Three-legged Toad – Isa itong simbolo sa Feng Shui na nakaaakit ng suwerte at kayamanan. Karamihan sa mga
three-legged toad ay may Chinese coin sa bibig. Suriin kung nakikita ang Chinese characters sa coin at siguraduhing nakaharap sa direksiyon ng kuwarto ang three-legged toad at kailanman ay hindi nasa labas.
Turtles or Tortoises – Sa Feng Shui, ang mga turtle o tortoise ay isa sa apat na celestial animals o mga guardians. Pinaniniwalaan din na pinananatili nila sa tahanan ang mabuting enerhiya ng kasaganahan, suwerte at katatagan.
Elephant – Ang mga elepante ay pinaniniwalaang nagbibigay proteksiyon, suwerte,
katalinuhan, at fertility. Maaari itong ilagay sa iyong opisina o tahanan. Sumisimbolo ang nakataas ng trunk ng elepante ng pagbuhos ng good luck. Kung ika’y naghahanap naman ng simbolo ng pagkakaibigan at pag-ibig, ang magkakabit na trunk na elepante ang para sa iyo.
Red Envelope – Ang pulang envelope na mas kilala sa tawag na “angpow” o “hungbao” o “laisee” ay simbolo ng pasasalamat. Sa paglipas ng panahon, ang mga envelope na ito ay nagkaroon na rin ng iba’t ibang disenyo na masuwerte sa feng shui. Naniniwala ang iba na kahit na walang laman ang makuha mong angpow ay masuwerte pa rin ito at nakaaakit pa rin ng suwerte.
Chi Lins – Ang Chi Lin ay isang nilalang na may ulo ng dragon, katawan ng kabayo, at may kaliskis ng isda. Hindi man ito kaaya-aya sa paningin, pinaniniwalaan namang poprotektahan ka nito mula sa panganib at bibigyan ka ng suwerte at kasaganaan. Kilala rin ang Chi Lin bilang Dragon Horse at Chinese Unicorn.