Ang Sampung Kinatatakutan Ng Tao
Fernando B. Sanchez
LIKAS daw sa tao ang may kinatatakutan. Takot sa multo o kung anu-ano. Tila anino ito na di matatakasan. Sa mga eksperto sa larangan ng supernatural, tulad nina Napoleon Hill at Sylvia Browne, may sampung kinatatakutan ang tao sa kanyang buhay- sa buong mundo.
Una at pangalawa, sa listahan ni Browne, sa kanyang aklat na “The Other Side and Back” ay rejection at abandonment. Pag-ayaw at pag-iwan. Ang dalawang nabanggit ay tila magkakambal o magkapatid na di puwedeng ihiwalay sa isa’t isa. Nakakasakit din ng damdamin kung nararamdaman mong inaayawan ka, iniiwan kang parang yagit, walang silbi, walang kuwenta, naiiwang mag-isa na nag-aanyaya ng takot sa personal na buhay.
Ang pangatlo’y frustration, kasawian o pagkabigo. Ang pagkabigo’y nagdudulot din ng sama ng loob, ng pag-alala at pagkatakot. Di ba’t maraming nagpapakamatay dahil sa kabiguan sa pag-ibig o mailap sa kanila ang tagumpay?
Ang pang-apat na kinatatakutan ng tao ay ang tagumpay. Oo, kinatatakutan din daw ang tagumpay ng mga taong ayaw nang bumaba sa kanilang trono o pedestal. Bukod dito’y ayaw nilang maagaw sa kanila ang korona tulad ng mga atleta. Ayaw nilang pagtawanan sila ng ibang tao dahil sila’y laos na kung kaya natatakot silang kupasan ng galing, talino at lakas.
Betrayal, ang panlima, o pantatraidor, pagkakanulo mula mismo sa kamay ng mga kaanak, kaibigan, katrabaho o kapalagayang-loob na sisira sa iyo, sa iyong mga adhikain at pangarap sa buhay. Sa ngayon, mahirap nang magtiwala sa ibang tao. Nakatatakot ang maaari nilang gawin.
Pang-anim, ang loneliness o kalungkutan, na ang sanhi’y maaaring kabiguan sa pag-ibig o pakikipagrelasyon, o kaya’y kabiguan sa nais makamit sa buhay, na pinaglaanan pa ng panahon at salapi, pagtitiwala at pag-asa. Ramdam mo, pag malungkot ka, tila katapusan na ng mundo. Feeling mo, nagiisa kang pumapasan sa mabigat na krus sa gitna ng dilim, ng mga unos na lumilikha ng pangamba, at ng di maiiwasang pagkatakot.
Pampito, ang illness, sakit o karamdaman. Pag dapuan ka ng malubhang karamdaman, di ka makakapaghanapbuhay, di ka gaanong nakakakain, di ka nakakatulog at babagyuhin ka ng mga alalahanin o problema. Isa na rito’y ang pangangailangan mo ng perang gagastusin sa pagpapaospital, pagkonsulta sa doktor at ibibili mo ng mga gamot na kailangan. O, e, paano kung wala kang sapat na pera, wala kang kamag-anak na malalapitan? At paano kung nag-iisa ka na sa buhay? Buti na lang may PHILHealth na ang mga indigent at senior citizens!
Ang pangwalo na kinatatakutan ay ang aging o pagtanda. Pag matanda na ang isang tao, wala na siyang kalayaang gawin ang nais niyang gawin. Mayroon na siyang mga limitasyon sanhi ng kahinaan na ng katawan, gayon din ang kahinaan niya sa pandinig, at lumalabong paningin. Suwerte siya kung may mag-aalaga sa kanya at ibigay ang kanyang mga pangangailangan araw-araw. Paano kung nasa malayo ang mga anak at kamag-anak? Sino ang magluluto sa kanya? Paano kung siya’y magkakasakit? Paano kung wala siyang pension kung siya’y isang retirado, o social pension kaya roon sa mga indigent
senior citizens? Batay sa aming obserbasyon, pag wala nang pakinabang sa iyo ang isang tao, kamag-anak man o kaibigan, pababayaan ka na! Ito ang kinatatakutan ng mga matatanda! Ang pansiyam na kinatatakutan ng tao’y ang tinatawag na loss o pagkawala ng isang bagay na mahalaga sa kanyang buhay tulad ng kanyang paningin, pandinig at pananalita, mawalan ng asawa, anak, o kaibigan, mawalan ng trabaho o mawalan
ng mga ari-arian, di ba’t nakakaalarma din ang mga ito? At nakakatakot?
Ang huling kinatatakutan ng tao’y ang death o kamatayan. Sa aming pagbabasa’t pakikipanayam sa mga tao sa aming kapaligiran, lumalabas na lubhang kinatatakutan si kamatayan dahil darating siya sa nakatakdang panahon, gusto man natin o hindi, nakahanda man tayo o hindi, sumusulpot, susunud-sunod, ano mang oras, at hindi maiiwasan. (Hebreo 9: 27) Takot din sa kanya ang mga tao dahil hindi alam kung anong mangyayari sa kanila pag namatay na, kung saan sila patutungo, sa langit ba o impiyerno? Walang nakakaalam! Ang kamatayan, sabi pa ng iba’y isang kaaway na mahirap gapiin!
Sa isang aklat naman ni Napoleon Hill, ang “Think and Grow Rich” bumanggit din siya ng mga bagay na kinatatakutan ng tao sa mundo. Sa anim niyang binanggit, apat ang tumutugma sa listahan ni Sylvia Browne, tulad ng sakit, pagtanda, pagkawala
(loss) at kamatayan. Dalawa ang wala sa listahan ni Browne, ang poverty (kahirapan) at criticism (pagpuna) na nagbubuyo ng pagkatakot.
Kay Hill, ang mga kinatatakutan ng tao ay walang iniwan sa mga multo na namamahay sa ating mga isipan at maaaring burahin ano mang oras. Kay Browne, imbes na katakutan ang kanyang mga nabanggit, kailangang harapin ang mga ito ng buong tapang. Dapat din taglayin ang akmang karunungan o kaalaman ukol dito upang di pamahayan ng takot. “Overcoming
fear,” sabi pa ni Browne, “makes the difference between a life fully lived and a life spent living in the dark where the sun cannot reach you.”