Mirasol, Nakangiti, Kumakaway
KILALA natin bilang sunflower. E, ano ba ang tawag sa sariling wika natin?
Pagpasok mo sa Unibersidad ng Pilipinas-Diliman ay kumakaway ang mga mirasol—o sunflower sa Ingles.
Para bang kinukumusta ng mga ito ang mga mag-aaral, mula sa mga nag-aasam pa lamang makapasok sa prestihiyosong pamantasan, hanggang sa sila’ý magsisipagtapos na. May siyentipikong pangalang helianthus, ang ginintuang bulaklak na ito ay sumisibol tuwing Abril sa Hardin ng UP Diliman. Ang pagkislap nito ay sumasabay sa pagsikat ng araw, na siyang pinaghanguan ng pangalan nito.
Tuwing umaga hanggang hapon ay tila nagkukuwentuhan ang araw at ang mga mirasol. Ang mirasol ay nagmula pa sa Hilagang Amerika. Una itong naitanim sa Europa ng mga Espanyol.
At dahil nga sa mahigit tatlong siglo ng pananakop ng Espanya, naitanim din nila ito sa ating mga lupain. Hindi mapasisinungalingan ang pang-aabuso ng imperyalistang Espanya sa ating bansa; ngunit isa ang mirasol sa ilang mga bagay na maipagpapasalamat din natin sa kanila. Ayon sa website ng UP, ang pagyabong ng mga mirasol sa mga hardin ng kanilang pamantasan ay bunga ng pagtutulungan ng mga opisyal, guro, alumni, at estudyante. Mula sa maliliit na binhi, nagsimula ito bilang eksperimento ng Campus Landscaping
and Arboretum (CLOA) noong 1980s. Sa pamumuno ng agrikulturista at dating direktor sa UP na si Dionisio Liwag, nakilala ang UP Diliman bilang academic sunflower capital during the summer season.
Nitong nakaraan lamang, naging usap-usapan sa internet ang mga kaso ng ipinagbabawal na pagpitas sa mga mirasol ng UPD. Sino ba naman ang hindi matutuksong pumitas ng mirasol?
Bukod sa kagandahang panlabas ay mayaman din ito sa langis at masustansiya ang binhi. Ngunit kung hindi maiiwasan ang pagpitas sa mga ito, untiunting masisira ang mga ginintuang palamuti. Kaya ngayon, malaki ang ginagastos ng pamantasan para sa pananatili ng kagandahan ng mga bulalak na ito. Ang mga mirasol, ang mga ginintuang bulaklak sa entrada ng prestihiyosong unibersidad ay hindi lamang palamuti sa mata ng mga estudyante at iba pang panauhin sa UP Diliman. Tahimik din itong kumakaway sa sinumang minsang madadaan sa hardin ng pamantasan.