Mga Bituin Sa Tubig (Wakas)
Efren Abueg
KINAGALITAN ni Armand ang sarili sa di niya napigil na lipad ng kaniyang imahinasyon. “Wishful thinking!” paanas niyang bulalas. “Hindi papayuhan ni Discarel sina Zaida at Normi na tanggapin ang ihaharap namin ni Virmin na DNA test results!” Ipakikipaglaban ni Discarel na masarili ang magkapatid. Gumamit ito ng salapi at panlilinlang para makuha sa ampunan sina Zaida at Normi! Nagbalatkayo ito at sinadyang mawala sa paningin ng publiko sa mahabang panahon sa pag-iwas na mabintangan sa pagpatay kay Marcelo Arago!
Kaya nang dumating si Armand nang gabing iyon sa condo unit niya, balik na naman siya sa dating problema.
Tatawagan ba niya si Virmin, gaya ng payo ni Sig, na pakiusapang sunduin sa terminal ng bus ang mag-inang Bart at Nancy?
Sabagay, maaaring utusan na lamang nito ang driver na