Haraya

Liwayway - - News - Dr. Michael M. Coroza

SI Cely Bautista ang kinilalang Reyna ng Jukebox noong kalagitnaan ng dekada singkuwenta. Mahigit isang taon pa lamang mula nang ipakilala siya ni Eddie San Jose bilang mangaawit sa programa sa radyong “Star Time” noong 1954, sa edad na labinlima, nasa walumpung plaka (78 rpm) agad ang nagawa niya sa iba’t ibang kompanya ng pagsasaplaka sa Filipinas. Ang mataginting at ekspresibong tinig niya ang naging boses sa pag-awit ni Anita Linda sa pelikulang

Porbida Gid (Premiere Productions, 1955). Ang paksang-awit ng nasabing pelikula, na may gayunding pamagat at isang komposisyon nina Danny Holmsen at Ading Fernando, ang kauna-unahang naisaplaka niyangkanta sa Mico Records.

Noong 1955 din, siya ang napili ni Tito Arevalo, pangunahing musiko at tagapaglapat ng musika sa mga pelikula nang panahong iyon, para umawit ng “Hinahanap Kita”sa pelikulang Bandilang Pula at ng “Irog, Ako ay Mahalin” sa pelikulang Pedro Penduko, kapuwa sa ilalim ng Premiere Productions. Ang dalawang awit na ito na inilabas na magkatalikuran sa iisang plaka ng Mico Records ang naghatid kay Cely Bautista sa rurok ng pagiging Reyna ng Jukebox nang taóng iyon. Literal na sa bawat kanto na may jukebox sa Filipinas noon, naririnig ang kaniyang tinig na matimyas na nagdadalamhati sa pag-awit ng mga letrang ito ni Luis Ma. Trinidad:

Hinahanap kita sa aking pangarap, Hinahanap kita sa lungkot at hirap. Isang ngiti mo lang puso ko’y nabihag, Tinatawag, hinahanap kita, liyag.

Ngunit isang araw, sinta, lumimot ka, Iniwan mo ang puso kong nagdurusa; Sakali mang ako’y sadyang limot mo na, Tatawagin, hahanapin pa rin kita.

Sa ganito kapayak na ekspresyon ng pangungulila sa nawalang sinta, na nilapatan ng dramatikong musika sa tunugang menor at nasa tiyempong dansa, marubdob na nakaugnay ang madla at parang kinatawan ng paghibik ni Cely ang paghibik ng sambayanang halos isang dekada pa lamang na nakababangon noon mula sa bangungot at kalunoslunos na idinulot ng ikalawang digmaang pandaigdig. Ang persona ng kaniyang kanta ang tila naging tagapagbulalas ng bayan ng mithiin nitong matagpuan ang mailap na kaginhawahan sa iba’t ibang aspekto ng búhay—pampolitika, panlipunan, at pang-ekonomiya. Tila sa bawat pagsambit ng “Hinahanap kita sa aking pangarap, / Hinahanap kita sa lungkot at hirap,” sumasadalumat ng bayang nakikinig ang lahat nitong pagtitiis sa pag-apuhap at pag-asam sa mga ideal na tila hindi na makakamit, at kayâ nanunuot ang masigabong lungkot sa kaibuturan ng loob, taimtim na nakikiawit kay Cely upang paulit-ulit na maluwalhating mairaos ang paghihimutok.

Sa pagtatapos ng dekada singkuwenta at sa buong dekada sisenta, naging pangunahing manganganta ng mga paksangawit ng pelikula si Cely Bautista. Naipareha siya kay Ruben Tagalog, ang di-opisyal na kinilalang “Hari ng Kundiman” sa pagkanta ng “Pandora,” isang komposisyon nina Tony Maiquez at Levi Celerio, na naging paksang-awit ng pelikula ng Premiere Productions na may gayunding pamagat. Sila rin ang nagdalawahang-tinig sa pag-awit ng kantang “Si Eva,si Adan” na isang novelty song ayon sa pagkakategorya ni Levi Celerio. Sa nasabing awit, mapaglarong inihahambing ng dalawang persona ang kanilang mga sarili sa mga unang tao ayon sa mitolohiyang Kristiyano. Sa sinumang makakapakinig sa ngayon, nakatutuwang matuklasan ang uri ng sisteng umiiral sa popular na awit noon. Kahit anim na dekadang mahigit na ang nakalilipas, sadyang walang naiiba sa mga problemang kinakaharap sa usaping pag-ibig at maging panlipunan at pampolitika. Narito ang letra ng nasabing kanta:

Cely: Kung ako lang ay si Eva at ikaw ay si Adan, Lagi tayong maligaya at wala tayong biyenan. Ruben: Kung naging Eva ka lamang at ako ay si Adan, Kaysarap ng buhay natin at walang makikialam.

Sabay: Lagi tayong mataba, nagkalat ang mansanas, Nagkalat din ang ubas, lahat ay walang bayad. Ang hirap lamang nito, kung tayo’y magpapasyal Ay wala man lamang taxi at walang mapuntahan.

Ruben: Kung tayo ang magkapiling noong unang panahon, Dadami ang anak natin pagkat walang birth control. Cely: Kung tayo ang unang tao ay walang konsumisyon, Ang damit natin ay dahon at wala nang pantalon.

Ruben: Kung ikaw lang ay si Eva at ako ang irog mo, Bakit ka pa magseselos? Solong-solo mo ako. Cely: Kung sinuman ang maglilo ay pihong mabubuko Pagkat ako ay si Eva... Ruben: Si Adan naman ako.

Sabay: Lagi tayong mataba, nagkalat ang mansanas, Nagkalat din ang ubas, lahat ay walang bayad. At kahit na malamig, di tayo magiginaw Pagkat lagi nang mainit ang ating pagmamahal.

Naging palagiang kasama siya ni Ruben sa pang-araw ng Linggong programa nito sa radyo, ang Harana ni Ruben Tagalog sa DZFM. Tumanyag din ang mga awit nilang “Sombrahan,” “Kailan Ka Uuwi.” Pagsapit ng kalagitnaan ng dekada sisenta, naglabas ang Villar Records ng dalawang long playing album nila, ang “Ruben at Cely” at “Mahal ko sa Buhay.”

(Itutuloy sa susunod na labas)

Cely Bautista: Reyna ng Jukebox ng kalagitnaan ng dekada 50.

Newspapers in Tagalog

Newspapers from Philippines

© PressReader. All rights reserved.