Mag-ingat Sa Mga Pekeng Kaibigan
LAGI silang nakangiti sa iyo, pinapaliguan ka ng papuri, at humahalik pa. Itinuturo nila kung ano ang "kailangan" mo. Kinukumbinsi ka nila na magkaroon ng maluhong pamumuhay. Ayaw nila na makuntento ka sa kung ano ang mayroon ka at kung ano ka. Hindi sila masaya kapag masagana at matagumpay ang buhay mo. Ilan lamang ang mga nabanggit sa mga katangian ng mga pekeng kaibigan.
Mayroong silang clever na paraan ng pagbibigay ng mga suhestiyon at ideya na para bang napakaganda sa simula. Mahusay silang magdrama at gumawa ng script, kaya hindi mahirap para sa kanila ang makapagpaniwala kahit ng mga edukadong tao. (Ang kagalingan sa pag-arte at panloloko ang isa sa mga dahilan kung bakit napakaraming tao ang nabibiktima ng mga abusado, ng scammers, at human traffickers.)
Kung minsan, madaling maniwala sa mga taong mapagpanggap, lalo na kung may ilang kabutihang nasabi at nagawa sila sa iyo noong nakaraan. Kahit pa nga ang mga nakagawa ng hindi maganda dati ay napapaniwalaan sa pag-iisip mo na baka nagbago na sila. Paglipas ng ilang buwan o ilang taon pa, mari-realize mo na lang na bahagi pala ng drama iyon para gamitin ka at saktan ka. May mga suhestiyon pa nga na nabanggit casually, parang hindi pinagplanuhan, parang okey, pero naaayon lang pala sa interes nila.
Mahusay ka na bang kumilala ng tunay at ng pekeng kaibigan? Isipin mo, bakit ginagawa ng mga kaibigan mo ang mga ginagawa nila? Ano ang mga bagay na lubos na pinahahalagahan nila (base sa kilos, hindi base sa salita). Ano ang ginagawa nila kapag hindi ka sumasang-ayon sa mga kagustuhan nila?
Mag-ingat sa mga nagpapanggap na kaibigan. Ang iba sa kanila, nakokonsensiya pang butasin ang bangka mo habang hindi ka nakatingin. Mas delikado pa sila kaysa sa mga lantad na kaaway.