Ang Limang Exit Points Tungo Sa Kamatayan
MARAMING manunulat ng Bibliya at lingkod-simbahan ang nagsasabing ang kamatayan ay isang pag-uwi sa tunay na tahanan o ng pinanggalingan. Ang pag-uwi ng kanyang espiritu sa Dakilang Diyos na nagbigay sa kanya ng hininga at sa lupa o alabok kung saan siya nanggaling nang hubugin siya ng Poong Lumikha sa katawang lupa ng tao na tataglayin niya habang siya’y nabubuhay. Ang pag-uwi na iniuugnay sa kamatayan ay may limang
exit points o labasan sa buhay tungo sa huling hantungan. Ayon kay Sylvia Browne, na sumulat ng aklat na “The Other Side and Back,” ang limang exit points na iyan ay daraanan sa buhay ng tao habang siya’y nabubuhay kung saan ay nagpapahiwatig, nagpaparamdam at aali-aligid si Kamatayan. Maaaring ito’y isang aksidente sa daan, pagkakasakit na muntik nang ikamatay ng kinauukulan, pag-atake o tangkang pagpatay, pagkalunod, pagkasunog, pagkalason o pag-inom ng lason, at iba pang pangyayari na dumarating na lang at sukat, at di kayang sansalain, dahil ang lahat ay nakatakdang mangyari, gustuhin man natin o hindi.
Lima ang mga iyan na sunud-sunod na darating hanggang sa oras ng iyong kamatayan. Ang isa’y maaaring dumating sa loob ng isa, dalawa, tatlo, lima, sampu at mahigit pang taon. Ayon pa rin kay Browne, maaari ring sukob sa isang taon ang dalawa o tatlong exit points. Ngunit hanggang di pa dumarating ang panlima o huling exit point, di pa mamamatay ang kinauukulan.
Di ba may mga pagkakataon na naghihingalo na ang isang tao’y mabubuhay pa rin siya kung di pa niya oras? Masasabing ito’y isang milagro o sadyang di pa dumarating ang kanyang panahong umuwi sa kanyang pinanggalingan. Minsa’y sinasabi rin natin na ‘bagong buhay’ o ‘pangalawang buhay’ sa isang taong nakaligtas sa isang aksidente, tangkang pagpatay o kapahamakang muntik nang kumitil sa kanyang buhay. Di nga ba marami na ang kaso ng NDE o Near-Death Experiences na ang isang taong naghingalo na’t napunta sa pintuan ng langit na kinaroroonan ni San Pedro’y napagsabihang bumalik muna siya sa lupa dahil di pa dumating ang nakatakdang panahon para sa kanya?
O, e, paano naman kaya ang mga bata o ang mga sanggol na naroroon pa rin sa sinapupunan ng ina ngunit namatay dahil sa aborsiyon? Nagkaroon din kaya sila ng limang exit
points? Ayon kay Browne, exception ang abortion o sanggol pa lamang ay namamatay na. Tinawag niya itong “immediate recall” o agarang pagtawag ng pag-uwi ng kinauukulan, ang di napapanahong kamatayan ng isang sanggol. Bahagi iyon ng ‘karma’ na di puwedeng itatwa o iwasan ninuman. Para na rin sa kanyang kabutihan.
Ang mga lingkod-simbahan ay naniniwalang puwede ring ipagpaliban ang pagdating ng panlima at huling exit point. Ito’y sa pamamagitan ng dalagin ng mga mahal sa buhay ng kinauukulan, o ng kanyang mga kamag-anak, kaibigan, kakilala o katrabaho kaya. Ngunit sabi nga, walang makakapigil sa nakatakdang panahon ng pag-uwi ng tao sa kanyang pinanggalingan. Darating at darating iyon. Uuwi at uuwi siya sa tunay niyang tahanan.
Ang limang exit points sa buhay ng isang tao’y nakatakda na. Kung pakikinggan natin ang mga taong naniniwala sa Reincarnation o ng paulit-ulit na inkarnasyon o muling pagbabalik-buhay ng mga kaluluwa sa mundong ibabaw, ang mga kaluluwa mismo sa ‘Other Side’ o sa daigdig ng mga espiritu, ang umuugit o mararamdaman nila sa daigdig ng mga buhay pagkatapos silang ipanganak na muli ng kanilang inang mortal!