Ang Halloween Sa Paningin Ng Ibang Church Workers
ANG Halloween ay isang okasyon, pagtitipon, ritwal na dinadaluhan ng mga kabataan, gayon din sa mga may edad na, tuwing ika-31 ng Oktubre, isang araw bago sasapit ang Araw ng mga Patay. Ayon kay Leonard N. R. Ashley, ang pagtitipon na ito’y naglalayong itaboy ang mga mangkukulam at masasamang espiritu na nanliligalig sa ating kapaligiran. Ito’y isang pagtitipon din kung saan malaya ang isang kalahok na makipagkaibigan doon sa espiritu ng isang spirit character ng suot na maskara o costume ng isa pang kalahok. Sa lumang tradisyon ng mga mamamayan ng Gran Britania, sa gabi ng Halloween puwede raw makilala ng isang dalaga o binata ang mapapangasawa niya sa hinaharap habang ginagawa ang bonfire. Halimbawa, maghagis siya ng ilang mansanas o naranghitang may pangalan ng mga gusto mong mapangasawa. Kung alin ang unang puputok siyang nakatakdang mapapangasawa mo.
Ngunit di maikakaila na may mga church workers, mga
ministro at pastor, ng iba’t ibang kongregasyon, ang nagsasabing ang Halloween ay walang basbas ng mga Salita ng Diyos. Sa totoo lang, may nagsasabing ang Halloween ang siyang pinakapaboritong holiday ng Diyablo. Totoo kaya?
Itinuturo ang mga isinusuot na maskara o costumes ng mga kalahok sa ritwal o programa na gaganapin. Di nga ba mukha ng Kamatayan, ng Diyablo, ng mga demonyo, ng mga horror characters sa pelikula at aklat ang karaniwang ipinakikita? Sila ba ang gustong maging kaibigan ng mga kalahok? Bakit hindi iyong imahen ng mga anghel o ng mga santo at santa, ng Tatlong Persona ng Diyos, ang Banal na Trinidad? Di ba Sila ang pinakamalakas na pangontra o panlaban sa mga masasamang espiritu?
Ayon kay Dr. Rebecca Brown, na sumulat ng aklat na pinamagatang “Prepare For War,” ang Halloween ay isang open door, isang lagusan, kung saan puwedeng pumasok sa puso at isipan ng mga kalahok ang masasamang espiritu na sisira sa katahimikan at katiwasayan ng mga kabataan. Kung iisipin pa ang posibilidad na papasok ang droga at nakalalasing na inumin sa nasabing okasyon, di na batid ang kahahantungan niyon sa kanilang buhay. Ang ibayong pag-iingat ay di lamang ukol sa mga kabataang gustong lumahok sa kasayahan, kundi ang mga magulang na rin na dapat sumubaybay sa mga ginagawa ng kanilang mga anak. Laging tatandaan: laging nasa huli ang pagsisisi!