Kelvin Miranda At Angel Guardian, Maganda Ang Chemistry
MAGANDA ang chemistry nina Kelvin Miranda at Angel Guardian. Ang dalawa ay parehong nasa pangangalaga ng T.E.A.M. (Tyronne Escalante Artist Management) ni Tyronne Escalante. Sina Kelvin at Angel ay nagkasama sa episode ng Beauty & The Hype Beast ng GMA digital short film series na One Hugot Away at recently sa Maynila, hosted by Cong. Lito Atienza sa episode na pinamagatang A Fake Love Story.
Kapwa bubbly at kalog sina Kelvin at Angel at kung mabibigyan ng magandang project ay puwedeng magclick bilang love team ang dalawa.
Si Kelvin ay three years na sa showbiz at aminadong noong una ay ayaw niyang mag-artista.
“Noong una medyo hindi pa ako ganoong kadesidido noong nagsimula sa industry, dahil medyo naiilang ako sa mga tao. Bale sina Sir James at ‘yung ate ko ang nagsasabi na subukan ko (mag-showbiz), sila ang nagpu-push sa akin,” aniya na idinagdag pang kalaunan ay nag-enjoy na siya sa kanyang ginagawa.
Paano niya ide-describe si Angel bilang katrabaho? Esplika ng Kapuso actor, “Okay naman si Angel, magkasundo kami kasi matagal na kaming magkakilala. Actually ako ‘yung reason kung bakit na kay Sir Tyronne siya, kasi ako ‘yung nag-recommend sa kanya. Magkaklase kami sa Star Magic, e.”
Ano naman ang masasabi niya kay Kelvin bilang katrabaho?
Sagot ni Angel, “Sanay na po ako kay Kelvin, matagal ko na siyang kasama, nagsasawa na nga po ako e,” sabay tawa.
Okay bang maging ka-love team si Kelvin?
Tugon n Angel, “Oo naman po, for more than three years na naging friend ko si Kelvin, siyempre thankful ako na wala na kaming ilangan, iyon ang maganda roon, hindi na mahirap, hindi mo na kailangang mag-adjust dahil kabisado na namin ang isa’t isa.”
Pahabol pa niya. “Enjoy naman po akong katrabaho si Kelvin, lagi lang kaming naglolokohan, biruan… and nagkakaintindihan kami ni Kelvin, kasi medyo parehas kami ng situation, siya rin iyong breadwinner sa family niya.”
Si Angel ay naging introducing sa pelikulang D’ Ninang na tinampukan ni Ai Ai dela Alas. Napanood din siya sa sa Onanay, Sahaya, at iba pang shows ng Kapuso Network.
Kabilang naman sa biggest break ni Kelvin sa showbiz so far ay nang nagbida siya sa pelikulang The Fate at Dead Kids na unang Netflix film mula sa Philippines.
“Nakakataba ng puso na naging part ako ng Dead Kids na first na Filipino na international na napanood… kasi ay na-appreciate talaga ng mga tao itong movie namin.
“Masarap sa pakiramdam na hindi lang kapwa Pinoy ang nakapanood sa iyo, kundi pati buong mundo, bale. Kasi talagang relevant iyong movie at na-appreciate talaga siya, lalo na ng mga kabataan ngayon.
“So, bale pinatunayan ng Dead Kids na kaya rin palang gumawa ng mga ganyang pelikula ang Pinoy, na kaya din nating makipagsabayan sa pang-international. Kaya sobrang proud po ako at thankful sa pelikulang iyan at hindi ko iyan makakalimutan sa habang huhay. Nagpapasalamat din ako kay Direk Mikhail Red sa opportunity na ibinigay niya sa aming lahat, napakabait niyang tao, cool, collaborative, at matalino,” eplika pa ni Kelvin.
Sa parte naman ni Angel nasabi niya ang aktres na gustong sundan ang yapak.
“As much as I can po, gusto kong magkaroon ng sariling path, pero sa showbiz po ang nilu-look-up ko iyong journey ay kay Ms. Marian Rivera.”
Sino pa ang gusto niyang makatrabaho in the future?
Sagot niya, “Marami po, like my girl crushes, Heart Evangelista, Rhian Ramos and Lovi Poe.”