City Health Office: Kaso ng mga nagkakasakit ng TB sa Puerto Princesa, mataas pa rin

Isang resolusyon ang ipinasa ng Sangguniang Panlungsod kahapon para i-adopt ang komprehensibong plano ng national government para malabanan ang sakit na tuberculosis o TB sa bansa.

Ayon sa chairman ng committee on health and sanitation sa Sangguniang Panlungsod na si Kagawad Roy Gregorio Ventura , ang Pilipinas ay pumapang-anim sa buong mundo na mayroong pinakamataas na kaso ng TB at pumapangatlo naman sa buong Southeast Asia.

Ang TB ay isang uri ng malubhang sakit na dulot ng impeksyon sa baga. Ang impeksyong na ito ay nag-uugat sa bacteria na tinatawag na mycobacterium tuberculosi.

Dito sa lungsod ng Puerto Princesa, ang kaso ng TB ay mas mataas pa umano sa kaso ng mga naitalang nagkasakit ng dengue at mga dinapuan ng sakit na HIV/ AIDS kaya kinakailangan na ng agresibong suporta at kampanya ng lokal na pamahalaan para mapababa ang kaso nito sa mga susunod na taon.

Ayon kay Assistant City Health Officer Dr. Dean Palanca, simula buwan ng Enero hanggang sa kasalukuyang buwan ng Hulyo nakapagtala na sila ng 440 na kaso ng TB at walo na ang naitalang drug resistant- TB o iyong hindi na tinatablan ng gamot.

Noong taong 2016 nakapagtala ang CHO ng 860 cases at 726 cases naman noong 2017. Ilang kaso na namonitor ay mula sa mga inmates ng Iwahig Prison and Penal Farm at ilan ay sa mga detinido sa Puerto Princesa City Jail.

“Bakit mataas ang case, makkikita sa prison dikit – dikit ang tao, yung isa kapag umubo na hindi agad nagamot hahawaan niya na yung isa na posibleng magkaroon na ng tb dahil ang hawa niya ay airborne,” pahayag ni Dr. Palanca

Ilan sa sintomas ng pagkakaroon ng sakit na TB ay ang pag-ubo na higit pa sa linggo na pwedeng may bahid ng dugo

o walang plema, pananakit ng dibdib at likod, lagnat na kadalasan sa hapon o gabi, walang gana sa pagkain at pangangayayat.

Kaugnay nito, hiniling ng CHO sa Pamahalaang Panlungsod ng Puerto Princesa na malaanan ng pondo ang pambili ng bagong digital x-ray machine. Ang isa nito ay nagkakahalaga ng mahigit anim na milyong piso at humihiling rin ng isang gene expert machine na nagkakahalaga ng 1.5 million pesos na makakatulong sa kanila na maka-detect ng mga may sakit na TB at mabigyan ng amot para malunasan ang sakit.