Lokal na Kultura at mga produkto muling ibibida ng Palawan sa MIMAROPA NATURALLY AGRI-TRADE TOURISM FAIR 2018
Muling ibibida ng Palawan ang mga natatanging produkto, kultura at atraksiyon nito sa gaganaping MIMAROPA Naturally AgriTrade Tourism Fair 2018 na magsisimula sa ika-17 ng Oktubre hanggang ika-21 ng buwang kasalukuyan sa SM Mega Mall, Mandaluyong City.
Ang MIMAROPA Naturally Agri-Trade Tourism Fair 2018 ay taunang isinasagawa upang mabigyan ng pagkakataon ang rehiyon na maipakita ang kanilang mga ipinagmamalaking produkto at natatanging atraksyon na makikita sa kanilang lugar. Layon rin nito na mapalakas ang mga micro, small and medium enterprises (MSME’s) upang mas dayuhin ito ng mga nais na mamuhunan.
Napag-alaman mula kay Gng. Bethel Wyeth C. Asag ng Provincial Economic Enterprise Development Office (PEEDO) na bahagi rin ng naturang gawain ang pagsasagawa ng mga cultural presentations, Regional Consumer Quiz Bee at Zumba hour.
Inaasahan na mayroong 86 na exhibitors mula sa Palawan ang makikibahagi sa Agri-Trade Tourism Fair. Kanilang itatampok ang mga ipinagmamalaking produkto ng lalawigan tulad ng daing, kasoy, coffee rice, mani, lamayo, suman sa bulo, honey, coco jam, sampalok candy, banana chips, buti-buti, tablea, wood artisan crafts, rattan baskets, pandan mats/bags, shell crafts, bamboo basket, handwoven basket/lanterns at bamboo straws at iba pa.
Maglalagay din ng Negosyo Center na magsisimula sa ganap na 1:00 hanggang alas 4:00 ng hapon.
Ang gawain ay sinikap na maisakatuparan sa pamamagitan ng DTIMIMAROPA, Department of Agriculture, DAMIMAROPA, Department of Tourism-MIMAROPA, DAR-MIMAROPA, DTIBureau of Small and Medium Enterprise Development at ng mga lokal na pamahalaan mula sa Marinduque, Occidental Mindoro, Oriental Mindoro, Palawan, Romblon, Calapan at lungsod ng Puerto Princesa. (P.R)