TIEZA office, tourist information center ng San Vicente, pinasinayaan
Pinangunahan ng Tourism Infrastructure and Enterprise Zone Authority (TIEZA) at Department of Tourism (DOT) ang seremonya sa pagpapasinaya ng mga gusali na magsisilbing opisina ng ahensiya at tourist information center sa bayan ng San Vicente, Palawan.
Ang mga gusali ay ipinagkaloob ng ahensiya para sa direktang pagbibigay ng serbisyo sa mga turista at pagtutok sa pagpapaunlad ng turismo sa lugar.
Sa kaniyang pananalita, sinabi ni TIEZA Chief Operating Officer Pocholo Paragas mahalaga na sa isahang pagkakataon ay maipagkakaloob at mapapanatili ang maayos serbisyo sa turismo para sa mabilisang paglago nito.
“We really know that the main driver right now that could really have the country’s economy integrated development is tourism (Alam natin na ang pangunahing nagdadala ngayon ng pang-ekonomiyang pag-unlad ng bansa ay ang turismo),” ani pa ni Paragas.
Positibo naman ang pamalahaang panlalawigan na malaki ang maitutulong ng mga proyekto ng TIEZA hindi lang sa lokal na pamahalaan kundi maging sa mga mamamayan ng San Vicente na isa sa mga pangunahing destinasyon ngayon lalo na ng mga dayuhang turista sa lalawigan.
“Being the flagship Tourism Enterprise Zone (TEZ) of TIEZA, malaki ang maitutulong nito sa mga kababayan natin, more opportunities tulad ng employment, businesses and investments, livelihood para sa ating mga kababayan, we have main strength of our community, iyong mga proyekto ng TIEZA ay nagagamit na sa ngayon gay ang kalsada,” tinuran ni Maribel Buñi, hepe ng Palawan Provincial Tourism Office (PTO).
Samantala, hangad ng LGU ng Palawan na mapataas pa ng tatlong milyon ang ‘tourist arrivals’ sa taong 2022, na base sa talaan ng PTO, umabot ng 1.5M sa nakalipas na taong 2017.
Pang-apat naman ang San Vicente sa pinaka dinarayong destinasyon sa lalawigan na ang pinakamarami ay mga dayuhang turista.
“We want tourist to stay longer and spend more para mas makinabang ang mga kababayan natin,” pahayag pa ni Buñi.