PALECO, aminadong hindi sapat ang pondo pambili ng SCADA
Hindi sapat ang pondo. Ito ang tugon ng pamunuan ng Paleco sa tanong ng mga kamay-ari na sumusubaybay sa programang ‘Oras ng Paleco’ kung bakit hindi kaagad mabili ng Paleco ang Supervisory Control And Data Acquisition o SCADA gayong marami namang koleksyong salapi ang kooperatiba mula sa buwanang bayarin ng mga konsumidores.
Ang SCADA ay isang software na makakatulong para mapadali at mapabilis ang pagbabalik ng kuryente sakaling magkaroon ng blackout. Nagkakahalaga ito ng humigit-kumulang 40 milyong piso.
Paliwanag ni Officerin-Charge Napoleon M. Cortes, Jr., ang mga electric cooperatives tulad ng Paleco ay revenue neutral. Ibig sabihin, hindi ito maaaring kumita dahil ang pangunahing layunin nito ay magbigay ng serbisyo. Kaugnay nito, mahigpit na binabantayan ng Energy Regulatory Commission (ERC) ang power rate ng Paleco at iba pang electric cooperatives upang masigurong sapat lang ang sinisingil para sa operasyon.
Dagdag ni OIC Cortes, walumpu’t limang porsyento (85%) ng ibinayad ng konsumidores ay napupunta sa mga power providers tulad ng Delta P, DMCI Power Corporation-Palawan, Palawan Power Generation Incorporated at National Power Corporation. Maliban dito, naniningil din ng Value Added Tax (VAT) ang Bureau of Internal Revenue (BIR) at ng universal charge ang Power Sector Assets and Liabilities Management Corporation (PSALM) kaya tinatayang nasa sampung porsiyento (10%) na lang ng ibinabayad ng mga konsumidores ang napupunta sa Paleco. Ito ang pinagkakasya ng Paleco para sa operasyon nito. Kung sakali namang may natipid ang Paleco sa loob ng isang taong operasyon, ibinabalik rin ang natirang pera sa mga miyembro nito sa pamamagitan ng dividend at patronage refund. ]
Upang maisakatuparan ang planong pagbili ng SCADA, isinama ito ng Paleco Board of Directors sa emergency Capital Expenditure ngunit hanggang ngayon ay iniintay pa rin na maaprubahan ito ng ERC. (P.R)