Drug surrenderees sa bayan ng Rizal na sumailalim sa Commmunity Enhancement and Livelihood Program, pormal nang nagtapos
Tatlumpu’t isa Recovering Drug Surrenderees (RDS) mula sa mga barangay ng Candawaga, Punta Baja, Panalingaan at Culasian sa bayan ng Rizal ang nagtapos sa ilalim ng Community Enhancement and Livelihood Program (CELP) ng Pamahalaang Panlalawigan noong ika-7 Nobyembre, taong kasalukuyan na ginanap sa Audio Visual Hall ng naturang munisipyo.
Dumalo sa seremonya sina Rizal Mayor Norman S. Ong, PSINSP. Michael Von Agsibit, Gil Padul ng DILG-Rizal, Joven Guerrero ng Municipal Social Welfare and Development Office (MSWDO) at Apple Magnificio ng Rural Health Unit-Rizal.
Sa mensahe ni G. Sammuel Bacosa na tumayong representante ng Pamahalaang Panlalawigan, ibinahagi niya ang malaking epekto ng programa sa mga drug surrenderees ganun din sa kanilang pamliya.
“Marahil matatapos ang CELP ganun pa man ang nangyayaring pagbabago sa ating mga sarili ay magtutuloy-tuloy mula sa mga natutunan ninyo sa progrma.” ani Bacosa.
Pinasalamatan naman ni Mayor Ong ang Pamahalaang Panlalawigan sa pagpapatupad ng programa sa kanilang lugar.
“Kung hindi naging seryoso ang lahat sa pagpapatupad nito hindi magiging matagumpay ang programa. May kasabihan tayo kapag hindi marunong lumingon sa pinanggalingan ay hindi makakarating sa kinaroroonan. Ngayon baliktarin natin, huwag na kayong lumingon doon sa naging dahilan ng pagkasira ng inyong mga buhay-- itong iligal na droga,” pahayag ni Mayor Ong.
Ang CELP ay programa ng Pamahalaang Panlalawigan na nakatuon sa 16 na linggong lecture module para sa mga drug surrenderees na sumuko sa ilalim ng Oplan Tokhang ng Philippine National Police. Naglalayon ito na mapanumbalik ang positibong pananaw sa buhay ng mga drug surrenderees sa pamamagitan ng moral and spiritual counselling, physical training, livelihood lectures at konkretong suporta ng komunidad sa pamamagitan ng Community Care Team (CCT).
Katuwang ng Pamahalaang Panlalawigan sa pagpapatupad ng programa ang munisipyo, mga Punong Barangay, Philippine National Police, Inter-Faith Organizations, Community Care Team at Philippine Marines.
Sa kasalukuyan, ang CELP ay naisakatuparan na sa mga munisipyo ng San Vicente, Kalayaan, Araceli, Roxas, Brookes Point, El Nido at Cuyo.(P.R)