Mga nurse at responders sa lalawigan nagtapos sa Basic Training Course on Emergency Medical Technician
Apatnapu’t walong mga nurse at responders mula sa iba’t ibang mga tanggapan at ahensya sa lalawigan ang nagtapos sa isinagawang Basic Training Course on Emergency Medical Technician (EMT) na ginanap sa Angela’s Farm, lungsod ng Puerto Princesa sa loob ng mahigit sampung araw.
Sa kahilingan ng Provincial Disaster Risk Reduction and Management Office (PDRRMO) ay nagsilbing tagapagsanay sa naturang gawain ang mga kawani mula sa Department of Health (DOH) MIMAROPA at mga miyembro ng (EMT) mula sa iba’t ibang ospital at organisasyon sa bansa na pinangunahan ni G. Mariano Christopher Abella na nagsilbing Course Director ng pagsasanay katuwang si G. Ezekiel Cefre bilang Assistant Course Director.
Ang batch Tarabangan ay nagsanay sa loob ng dalawang linggong kung saan sumailalim sila sa iba’t ibang uri ng aktibidad upang matapos ang lahat ng mga paksa na nakapaloob sa kurso. Maliban sa normal na talakayan ay nagkaroon din ng mga drill at simulation o demo ang mga partisipante upang maipakita ang kanilang natutunan mula sa mga talakayan.
Ayon sa mga partisipante, maliban sa teknikal na aspeto ng pagiging isang EMT ay team work ang isa sa mga mahahalagang natutunan nila sa pagsasanay. Nahubog din umano ng pagsasanay na ito ang kanilang karakter bilang isang medical responder.
Sa ginanap namang investiture ng mga partisipante noong ika-5 ng Nobyembre ay nangako silang magbibigay ng serbisyo sa mga kapwa nila Palaweño mayroon man o walang sakuna. Kanila ring ipinangakong ibabahagi nila ang kanilang kaalaman sa kanilang mga kasamahan kung kinakailangan.
Ikinatuwa naman ni PDRRM Officer Jeremias Alili ang pagtatapos ng mga partisipante. Aniya, nakakatuwa umanong marami na ang makakatulong hindi lang sa mga Palaweño kundi maging sa ibang mga probinsya o rehiyon tuwing panahon ng sakuna dahil maaari rin umanong ipadala ang mga partisipante sa ibang lugar upang magbigay ng tulong.
Ang mga partisipante ay mga kawani mula sa PDRRMO, Palawan Rescue 165 Operation Centers, Municipal Health Office, mga nurse mula sa iba’t ibang mga ospital sa lalawigan, at iba iba. (P.R)