Pamahalaang Panlalawigan ng Palawan sumaksi sa paglagda ng Letter of Intent sa pagitan ng Haikou City sa Hainan province at lungsod ng Puerto Princesa

Sinaksihan ng Pamahalaang Panlalawigan ng Palawan sa pangunguna ni Gob. Jose Ch. Alvarez ang paglagda ng Letter of Intent sa pagitan ng Lungsod ng Puerto Princesa at Haikou City ng Hainan Province sa China. Ang naturang gawain ay ginanap kaninang umaga, ika-9 ng Nobyembre sa Victoriano J. Rodriguez Hall ng gusaling Kapitolyo.

Pinangunahan ni Puerto Princesa City Mayor Lucilo R. Bayron at G. Fang Zhongli, deputy director of the Standing Committee ng Haikou Municipal People’s Congress ang paglagda ng Letter of Intent na naglalayong pagtibayin ang sister city relationship sa pagitan ng dalawang lungsod sa pamamagitan ng kooperasyon sa komersyo, turismo, edukasyon, kultura, at iba pa.

Ang seremonya ng paglagda ay dinaluhan din ng iba pang mga delegado ng lungsod ng Haikou at probinsya ng Hainan, Bise-Gob. Victorino Dennis M. Socrates, mga konsehal ng lungsod ng Puerto Princesa, Provincial PNP Chief Gabriel C. Lopez, mga department heads ng Pamahalaang Panlalawigan, at kinatawan ng Palawan Council of Sustainable Development (PCSD).(P.R)