1.3M, ibinigay na tulong puhunan sa 3 kooperatiba sa Palawan

Umabot sa P1.3 milyon ang naibigay na tulong puhunan ng Pamahalaang Panlalawigan ng Palawan sa tatlong kooperatiba sa Palawan sa katatapos na 10th Provincial Cooperative Convention.

Parehong P500,000 ang tinanggap na tulong puhunan ng Sofronio Española Farmers Multi-Purpose Cooperative at Coron School of Fisheries Multi-Purpose Cooperative para sa kanilang lending business. Ang ayudang ito ay mula sa Sustained Livelihood Opportunities and Growth for Cooperatives o SULONG.

Samantala, tumanggap naman ng P300,000 ang Agricultural Cooperative of Sofronio Esapañola mula sa Upgrading Support for the Advancement and Development of Entrepreneurs in Cooperatives o USAD program.

Ang dalawang programang nabanggit ay mga programang ipinatutupad ng Provincial Cooperative Development Office (PCDO) sa pamumuno ni Victoria P. Ladica na naglalayong palakasin ang mga maliliit at aktibong kooperatiba sa Palawan.

Ang nasabing tulong puhunan ay babayaran ng mga benepisyaryong kooperatiba ng walang interes sa loob ng 12 buwan o kaya ay sa loob ng 24 na buwan.

Isinagawa ang nasabing kombensiyon bilang pakikiisa sa pagdiriwang ng Buwan ng Kooperatiba na may temang “Kooperatiba: Sa diwa ng pagkakaisa ay daan tungo sa tunay na pagbabago at pagunlad ng pamayanan”. Ito ay sa pangunguna ng Provincial Cooperative Development Council (PCDC) at ng PCDO.

Mahigit 200 miyembro at opisyales ng mga kooperatiba sa lalawigan ang dumalo sa nasabing pagtitipon. (OCJ/ PIA-MIMAROPA, Palawan)

Tinanggap ng opisyal ng Coron School of Fisheries Multi-purpose Cooperative ang tulong puhunan na nagkakahalaga ng P500,000 mula sa Provincial Cooperative Development Office (PCDO) sa ilalim ng Sustained Livelihood Opportunities and Growth for Cooperatives o SULONG Program. (Larawan mula sa Provincial Information Office)