Ordinansa na nagbabago sa alintuntunin kaugnay ng Barangay Budgetary aid ipinasa sa 42nd Sangguniang Panlalawigan

Nagpasa ng ordinansa kamakailan ang Sangguniang Panlalawigan upang baguhin ang alituntunin sa pagbibigay ng Barangay Budgetary Aid. Sa pamamagitan ng Ordinance No. 2055-18, tinatanggal na ang “Paragraph F, Section 4” na nakasaad sa Ordinance 1944-18 na tumutukoy sa Submission of Audited Financial Report, na ayon sa mga miyembro ng Junta Probinsyal ay hindi dapat maging basehan.

Ayon sa Ordinance 2055-18 sa ilalim ng Section 468 (a) (2) (1), binibigyang kapangyarihan ang lokal na Pamahalaan na maglaan ng pondo para sa mga partikular na programa, proyekto, serbisyo o aktibidad kung ito ay lehitimo, hindi labag sa batas, para sa kabutihan at kapakinabangan ng mga mamamayan.

Gayon din sa Section 324 ng Local Government Code, ang mga lokal na Pamahalaan tulad ng lalawigan, lungsod at munisipiyo ay obligadong maglaan ng budget bilang tulong sa kanilang component na barangay na hindi bababa sa halagang P1,000 kada piskal na taon.

Gayunpaman dahil nakikita ng Pamahalaang Panlalawigan sa ilalim ng pamamahala ni Gob. Jose Chaves Alvarez ang pangangailangan ng mga barangay at upang makasabay ito sa kaunlaran ng lalawigan na kanyang mithiin para sa mga Palaweño, naglaan siya ng karagdagang 36,7000,000 para mabigyan ng P99,000.00 bilang aid o tulong ang bawat barangay na may kabuoang 367 sa buong lalawigan.(PR)