Pamunuan ng PALECO, binigyang diin na ayaw rin ng blackout
Ipinahayag ni Officer-inCharge Napoleon M. Cortes, Jr. na hindi rin gusto ngv pamunuan ng Paleco ang blackout.
Bukod sa nagagalit ang mga konsumidores, malaki rin ang nawawalang pondo para sa operasyon ng Paleco. Sa taya ng Finance Services Department (FSD), nasa P 150,000 ang nawawala sa Paleco sa loob ng isang oras na total blackout at kung aabot pa ito ng sampung oras, aabot ng halagang 1.5 milyon ang mawawala. Patuloy din ang pagpapasuweldo sa mga empleyado at napapagastos pa ang pamunuan sa overtime pay ng mga linemen na nagtatrabaho kahit gabi para lamang maibalik ang daloy ng kuryente.
Binigyang-diin ni OIC Cortes na gumagawa naman ng mga hakbang ang pamunuan upang maiwasan ang nararanasang blackout. Unti-unti na umanong dumarating ang mga insulated wire ng Paleco at inaasahang bago matapos ang taon ay masisimulan na ang pagpapalit ng insulated wire sa mga bare wire lalo na roon sa mga mapupunong lugar sa lalawigan. Napag-alaman kasi ng Technical Services Department na walumpung porsiyento ng dahilan ng power interruption sa Palawan ay dahil sa pagsagi ng sanga o baging sa linya ng kuryente.
Bukod sa pagpasa ng aplikasyon ng Capital Expenditure Plan sa Energy Regulatory Commission, patuloy rin ang pakikipag-ugnayan ng Paleco sa ilang pamahalaang lokal sa Palawan upang makapagsagawa ng malawakang paglilinis ng linya ng kuryente.
Paalala lang ng Paleco na hindi laging ang distribution line ang pinagmumulan ng blackout. May mga hindi naiiwasang pagkakataon na nagkakaroon ng total blackout dahil sa pagpalya ng makina ng power providers tulad ng Delta P, DMCI Power Corporation - Palawan, Palawan Power Generation Incorporated at National Power Corporation. Minsan naman ay nagkakaroon ng problema sa transmission line ng Napocor. (P.R)